ஈரோடு: ஈரோட்டில் நேற்று முன்தினம் இரவு முதல் நேற்றிரவு வரை ஜவுளிச்சந்தை நடந்தது. வழக்கத்தைவிட நேற்று கூடுதலாக சாலையோர கடைகளும், மார்க்கெட் பகுதியில் கடைகளும், வாகனங்களில் வைத்தும் விற்பனை நடந்தது.


இதுபற்றி வியாபாரிகள் கூறியதாவது: கடந்த சில வாரமாக குளிர், பனி நீடித்ததால் அதற்கேற்ப ஆடைகளை மக்கள், கடைக்காரர்கள், வியாபாரிகள் வாங்கி சென்றனர். சில நாட்களாக பனி குறைந்து, பகலில் கடும் வெயில் வாட்டுவதால், காட்டன் துணிகள், துண்டு, பெட்ஷீட், நைட்டி, வேட்டி, லுங்கி, பனியன், டீ-ஷர்ட் அதிகம் வாங்க துவங்கி உள்ளனர். மார்ச், ஏப்., மாதங்களில் விற்பனை சீசன் இருக்காது என்பதால், சில்லறை விற்பனையே அதிகமாக நடந்தது. கடைக்காரர்கள், வியாபாரிகள் குறைவாகவே வந்தனர். மொத்த விற்பனையைவிட, சில்லறை விற்பனையாக மக்கள் ஓரளவு வாங்கி சென்றனர். இவ்வாறு கூறினர்.