கராச்சி: இங்கிலாந்து அணியின் கேப்டன் பதவியில் இருந்து விலகுவதாக பட்லர் தெரிவித்துள்ளார்.
கடந்த 2022ல் இங்கிலாந்து ஒருநாள், 'டி-20' அணியின் கேப்டனாக ஜோஷ் பட்லர் 34, நியமிக்கப்பட்டார். இவரது தலைமையில் இங்கிலாந்து அணி, 2022ல் 'டி-20' உலக கோப்பை வென்றது. அதன்பின், 50 ஓவர் (2023), 'டி-20' (2024) உலக கோப்பையில் சோபிக்கத்தவறியது. சமீபத்திய தொடர்களிலும் ஏமாற்றிய இங்கிலாந்து அணி, சாம்பியன்ஸ் டிராபியில் ஆஸ்திரேலியா, ஆப்கானிஸ்தானிடம் தோல்வியடைந்து அரையிறுதி வாய்ப்பை இழந்தது.

இன்று கராச்சியில் நடக்கும் லீக் போட்டியில் இங்கிலாந்து, தென் ஆப்ரிக்கா அணிகள் மோதுகின்றன. இப்போட்டியுடன் இங்கிலாந்து ஒருநாள், 'டி-20' அணியின் கேப்டன் பொறுப்பில் இருந்து விலகுவதாக பட்லர் தெரிவித்தார்.
இதுகுறித்து பட்லர் கூறுகையில், ''கேப்டன் பொறுப்பில் இருந்து விலக, சரியான நேரமாக கருதுகிறேன். இத்தொடர் எனது கேப்டன் பதவிக்கு முக்கியமானதாக இருந்தது. எதிர்பார்த்த முடிவு கிடைக்காததால், விலக முடிவு செய்தேன்,'' என்றார்.