ஆர்.எஸ்.மங்கலம்:ராமநாதபுரம் மாவட்டம், ஆர்.எஸ்.மங்கலத்தில் வாரந்தோறும் மிளகாய் சந்தை நடக்கிறது. நேற்று நடந்த வாரச்சந்தைக்கு, 300 குவின்டால் குண்டு மிளகாய் வத்தல் விற்பனைக்கு வந்திருந்தது.

மார்ச் இரண்டாவது வாரத்தில் முதல்தர பெரிய வகை குண்டு வத்தல் குவின்டால், 21,500 ரூபாய்க்கு விற்ற நிலையில், நேற்று குவின்டாலுக்கு 5,000 ரூபாய் விலை வீழ்ச்சி அடைந்து, 16,500 ரூபாய்க்கு விற்பனையானது.

அதேபோல், குவின்டால் 15,000 ரூபாய்க்கு விற்பனையான இரண்டாம் தர சிறிய வகை குண்டு வத்தல், 1,000 ரூபாய் விலை வீழ்ச்சி அடைந்து, 14,000 ரூபாய்க்கு விற்பனை ஆனது.

கடந்த, 15 நாட்களில் குவின்டாலுக்கு, 5,000 ரூபாய் வரை வத்தல் விலை வீழ்ச்சி அடைந்ததால் விவசாயிகள் கவலை அடைந்தனர். பெரும்பாலான வியாபாரிகள் சிண்டிகேட் அமைத்து விலை நிர்ணயம் செய்வதால், போதிய விலை கிடைக்கவில்லை என, விவசாயிகள் தெரிவித்தனர்.