அருப்புக்கோட்டை:100 நாள் வேலை வாய்ப்பு திட்டத்திற்கு நிதி ஒதுக்கவில்லை என மத்திய அரசைக்கண்டித்து நேற்று காலை 10:15 மணிக்கு விருதுநகர்மாவட்டம் அருப்புக்கோட்டை அருகேயுள்ள பாலவநத்தம் ஊராட்சி அலுவலகம் முன் வடக்கு ஒன்றிய தி.மு.க., சார்பில் அமைச்சர் சாத்துார் ராமச்சந்திரன் தலைமையில் ஆர்ப்பாட்டம் நடந்தது. மத்திய அரசை கண்டித்து கோஷங்கள் எழுப்பினர்.

ஆர்ப்பாட்ட முடிவடையும் நேரத்தில் பாலவநத்தத்தை சேர்ந்த வடக்கு ஒன்றிய பா.ஜ., துணைத்தலைவர் மீனா அமைச்சரிடம், 'இன்று உலக தண்ணீர் தினத்தை முன்னிட்டு கிராமசபை கூட்டம் அறிவிக்கப்பட்டதை ஏன் ஆர்ப்பாட்டமாக நடத்துறீங்க என, கேள்வி எழுப்பினார்.

அதற்கு அமைச்சர் ''கிராம சபை கூட்டம் 11:00 மணிக்கு மேல் தான் நடக்கும்'' என கூறிவிட்டுச் சென்றார். அங்கிருந்த பா.ஜ., வடக்கு ஒன்றிய தலைவர் நாகராஜன் ''100 நாள் வேலைவாய்ப்பு திட்டத்தில் 35 கோடி ரூபாய் ஊழல் நடைபெற்று உள்ளது ''என பலத்த குரலில் கூறினார். போலீசார் அவர்களை அங்கிருந்து கலைந்து போக செய்தனர்.