சென்னை: காவல் துறை மற்றும் தீயணைப்பு துறை சார்பில், 41.32 கோடி ரூபாய் செலவில் கட்டப்பட்டுள்ள கட்டடங்களை, முதல்வர் ஸ்டாலின் நேற்று, 'வீடியோ கான்பரன்ஸ்' வாயிலாக திறந்து வைத்தார்.

சிவகங்கை மாவட்டம் திருப்பத்துாரில், 50; தஞ்சாவூர் மாவட்டம் திருவையாறில், 46 என மொத்தம், 96 காவலர் குடியிருப்புகள், 18.06 கோடி ரூபாயில் கட்டப்பட்டுள்ளன. ராமநாதபுரம் மாவட்டம் தேவிப்பட்டினத்தில் போலீஸ் நிலையம்; திருவாரூர் மாவட்டம் நன்னிலத்தில், மகளிர் போலீஸ் நிலையம், 1.74 கோடி ரூபாயில் கட்டப்பட்டுஉள்ளன.

தீயணைப்பு துறை

சென்னை துரைப்பாக்கத்தில் 6; மயிலாடுதுறை மாவட்டம் பூம்புகாரில் 2; ராணிப்பேட்டையில் 19; திருச்சி மாவட்டம் துறையூரில், 18 குடியிருப்புகள் கட்டப்பட்டுள்ளன.

சென்னை அம்பத்துார்; மயிலாடுதுறை மாவட்டம் பூம்புகார்; தேனி மாவட்டம் கடமலைக்குண்டு; திருவள்ளூர் மாவட்டம் பூந்தமல்லி ஆகியவற்றில், தீயணைப்பு நிலையங்கள் கட்டப்பட்டுள்ளன. இவற்றை முதல்வர் ஸ்டாலின், நேற்று தலைமைச் செயலகத்தில், 'வீடியோ கான்பரன்ஸ்' வாயிலாக திறந்து வைத்தார்.

அத்துடன் காவல் துறை பயன்பாட்டிற்காக, 5 கோடி ரூபாயில், 500 இரு சக்கர வாகனங்கள்; 27.09 கோடி ரூபாயில் வாங்கப்பட்டுள்ள, 300 பொலிரோ வாகனங்கள்; தீயணைப்பு துறைக்கு, 28.45 கோடி ரூபாயில், 50 நீர்தாங்கி வண்டிகள், 10 ஜீப்புகள், 50 இரு சக்கர வாகனங்கள் வாங்கப்பட்டுள்ளன.

இந்நிகழ்ச்சியில், தலைமை செயலர் முருகானந்தம், உள்துறை செயலர் தீரஜ்குமார், டி.ஜி.பி., சங்கர் ஜிவால், தீயணைப்புத் துறை இயக்குனர் அபாஷ்குமார் பங்கேற்றனர்.