பொன்னேரி:பொன்னேரி அடுத்த மெதுாரில் இருந்து வேம்பேடு, கோளூர் வழியாக தேவம்பட்டு செல்லும் சாலை உள்ளது. இந்த சாலையில், ஆவூர் கிராமம் அருகே மழைநீர் செல்வதற்கான சிறுபாலம் அமைக்கப்பட்டு உள்ளது. இதற்கான இணைப்பு சாலை சேதமடைந்து உள்ளது.

இதுகுறித்து இரண்டு மாதங்களுக்கு முன் நம் நாளிதழில் செய்தி வெளியானது. இதையடுத்து சேதமடைந்த பகுதிகளை அகற்றிவிட்டு, ஜல்லிக் கற்களை கொட்டி நெடுஞ்சாலைத் துறை நடவடிக்கை எடுத்தது.

அரைகுறையாக விடப்பட்ட இணைப்பு சாலை சீரமைப்பு பணிகளால், வாகன ஓட்டிகள் கடும் சிரமத்திற்கு ஆளாகி உள்ளனர். தற்போது, அப்பகுதியில் ஜல்லிக் கற்கள் பெயர்ந்தும், பள்ளங்கள் ஏற்பட்டும் உள்ளதால், பாலத்தை கடக்கும்போது வாகன ஓட்டிகள் தடுமாற்றம் அடைகின்றனர்.

இரவு நேரங்களில் இருசக்கர வாகனங்களில் செல்வோர் தடுமாறி விழுந்து சிறு சிறு விபத்துகளில் சிக்கி வருகின்றனர். ஜல்லிக் கற்களில் இருந்து புழுதி பறப்பதால், சுவாச கோளாறு ஏற்படும் அபாயம் உள்ளது. எனவே, பாலத்தின் இணைப்பு சாலையை சீரமைக்க வேண்டும் என, வாகன ஓட்டிகள் கோரிக்கை விடுத்துள்ளனர்.