சென்னை, காட்டாங்கொளத்துாரில் நடந்த சர்வதேச அளவிலான, 'பிடே ரேபிட் ரேட்டிங்' செஸ் போட்டியில், தமிழக வீரர்கள் முதல் பத்து இடங்களை பிடித்து அசத்தினர்.

எஸ்.ஆர்.எம்., பல்கலை, கோல்டன் நைட் சீஸ் அகாடமி மற்றும் மாஸ்டர் மைண்ட் செஸ் அகாடமி இணைந்து, சர்வதேச அளவிலான பிடே ரேபிட் ரேட்டிங் செஸ் போட்டியை, காட்டாங்கொளத்துாரில் நடத்தின.

இதில், நான்கு நாடுகள் மற்றும் 9 மாநிலங்களை சேர்ந்த, 327 சர்வதேச மாஸ்டர்கள் உட்பட மொத்தம் 609 வீரர் - வீராங்கனையர் பங்கேற்றனர். முதல் நாள் போட்டியை, பல்கலையின் இணை இயக்குனர் கிருஷ்ணமோகன், விளையாட்டுத்துறை இயக்குனர் மோகனகிருஷ்ணன் ஆகியோர் துவக்கி வைத்தனர்.

போட்டிகள், மொத்தம் 10 சுற்றுகள் அடிப்படையில் நடத்தப்பட்டன. அனைத்து சுற்றுகள் முடிவில், 8 புள்ளி 5 புள்ளிகள் பெற்று, தமிழக வீரர் முகமது அனீஸ் முதலிடத்தை பிடித்தார்.

அவரைத் தொடர்ந்து, தமிழக வீரர்கள் செந்தில்மாறன், ஆதர்ஷ், ஷியாம், தேஜஸ்வினி ஆகியோர், தலா 8 புள்ளிகள் பெற்று, முறையே இரண்டு முதல் ஐந்து இடங்களை பிடித்தனர்.

கவுசிக், ஆர்.ஆர்.லக் ஷ்மணன், சிவன் ரோஷன், ஹரி கணேஷ் மற்றும் வர்கீஸ் ஆகியோர் 7. 5 புள்ளிகள் பெற்று, முறையே ஆறு முதல் பத்து இடங்களை கைப்பற்றினர்.

இவர்களைத் தொடர்ந்து, மேலும் 101 பேருக்கு கோப்பைகளும் வழங்கப்பட்டன. வெற்றி பெற்றவர்களுக்கு, பல்கலையின் நிர்வாக இணை இயக்குனர் திருமுருகன் பரிசுகளை வழங்கினார்.