போர்ட் லாடர்டேல்: லீக்ஸ் கோப்பை கால்பந்து போட்டியில் மெஸ்சி 'அசிஸ்ட்' செய்து கைகொடுக்க இன்டர் மயாமி அணி 2-1 என, அட்லாஸ் அணியை வீழ்த்தியது.

கனடா, அமெரிக்காவில், லீக்ஸ் கோப்பை கால்பந்து 5வது சீசன் நடக்கிறது. இதன் லீக் போட்டியில் இன்டர் மயாமி, அட்லாஸ் அணிகள் மோதின. இதில் இன்டர் மயாமி அணி 2-1 என்ற கோல் கணக்கில் வெற்றி பெற்றது.

ஒரு போட்டியில் விளையாட விதிக்கப்பட்ட தடைக்கு பின் மீண்டும் களமிறங்கிய இன்டர் மயாமி அணியின் அர்ஜென்டினா நட்சத்திர வீரர் மெஸ்சி, சகவீரர்கள் செகோவியா (58வது நிமிடம்), மார்சிலோ வெய்காண்ட் (90+6வது நிமிடம்) தலா ஒரு கோல் அடிக்க உதவினார். ஆட்ட நாயகன் விருதை மெஸ்சி தட்டிச் சென்றார்.
கடைசியாக விளையாடிய 5 போட்டியில், 8 கோல், 3 'அசிஸ்ட்' என அசத்திய மெஸ்சி, மேஜர் லீக் கால்பந்து தொடரில் ஜூலை மாதத்திற்கான சிறந்த வீரர் விருதை கைப்பற்றினார். இந்த ஆண்டு இன்டர் மயாமி அணிக்காக 18 போட்டியில், 18 கோல், 7 'அசிஸ்ட்' செய்துள்ளார் மெஸ்சி.