மூணாறு: கேரள மாநிலம் மூணாறு அருகே இரவிகுளம் தேசிய பூங்காவில் வழக்கத்தை விட முன்கூட்டியே வரையாடுகள் பிரசவிக்க துவங்கின.

அங்கு அபூர்வ இன வரையாடு ஏராளமாக உள்ளன. அவற்றை பார்க்க பூங்காவுக்கு உட்பட்ட ராஜமலைக்கு சுற்றுலா பயணிகளை வனத்துறையினர் அனுமதிக்கின்றனர். ஆண்டு தோறும் ஜூன், ஜூலையில் சாரல் மழையின்போது வரையாடுகள் இனப்பெருக்கத்தில் ஈடுபடும். பிரசவ காலம் பிப்ரவரியில் துவங்கி மார்ச் இறுதி வரை நீடிக்கும். அப்போது ராஜமலைக்கு பயணிகள் செல்ல அனுமதி மறுக்கப்படும்.

அதற்கு முன் ஜனவரியில் வனக்காவலர்கள் அவற்றை கண்காணிப்பது வழக்கம். அவ்வாறு கண்காணிக்கப்பட்டதில் தற்போது வழக்கத்தை விட முன் கூட்டியே ராஜமலையில் குட்டிகள் பிறந்ததாக தெரியவந்தது.

அதனால் வழக்கம் போல் பிப்., 1 ல் பூங்கா அடைக்க வாய்ப்புள்ளது. கடந்தாண்டு ஏப்ரலில் நடந்த கணக்கெடுப்பில் இப்பூங்காவில் புதிதாக பிறந்த குட்டிகள் உட்பட 841 வரையாடுகள் உள்ளதாக தெரியவந்தது.