புதுடில்லி: வளர்ச்சிக்கான எங்களின் சாதனையும், தொலைநோக்குப் பார்வையும் மஹாராஷ்டிரா உள்ளாட்சித் தேர்தலில் ஒரு தாக்கத்தை ஏற்படுத்தியுள்ளது என்று பிரதமர் மோடி கூறி உள்ளார்.

மஹாராஷ்டிரா உள்ளாட்சித் தேர்தலில் பாஜ தலைமையிலான கூட்டணி பெரும்பான்மையான இடங்களை கைப்பற்றி உள்ளது. மும்பை மாநகராட்சித் தேர்தலில் கிடைத்த இந்த வெற்றியின் மூலம் 30 ஆண்டுகால தாக்கரே குடும்பத்தின் ஆதிக்கம் முடிவுக்கு வந்து இருக்கிறது.

உள்ளாட்சித் தேர்தலில் கிடைத்த வெற்றியை பாஜவினரும், தேசிய ஜனநாயக கூட்டணி கட்சியினரும் கொண்டாடி வருகின்றனர். இந் நிலையில், தேர்தல் வெற்றி குறித்து மகிழ்ச்சி தெரிவித்துள்ள பிரதமர் மோடி, மஹாராஷ்டிரா மாநில மக்களுக்கு நன்றி தெரிவித்துள்ளார்.

இதுகுறித்து அவர் தமது எக்ஸ் பதிவில் கூறி உள்ளதாவது;

மஹாராஷ்டிரா முழுவதும் அயராது உழைத்த ஒவ்வொரு தேசிய ஜனநாயக கூட்டணியின் தொண்டர்களை நினைத்து நான் மிகவும் பெருமை அடைகிறேன். எங்கள் கூட்டணியின் சாதனைகளை மக்களிடம் எடுத்து பேசியுள்ளனர்.

எதிர்காலங்களில் எங்களின் தொலைநோக்கு பார்வையை எடுத்துக் கூறி உள்ளனர். களத்தில் எதிர்க்கட்சிகளின் பொய்களை திறம்பட எதிர்கொண்டு இருக்கின்றனர். அவர்களுக்கு என் வாழ்த்துகள். மஹாராஷ்டிராவுக்கு நன்றி.

மக்களுக்கான நல்லாட்சி, சிறந்த நிர்வாகம் என்ற தேசிய ஜனநாயக கூட்டணியின் செயலை மக்கள் ஆசிர்வதித்து உள்ளனர். பல்வேறு நகராட்சிகளின் தேர்தல் முடிவுகள்,மக்களுடனான பிணைப்பை மேலும் வலிமைப்படுத்தும் என்ற தேசிய ஜனநாயக கூட்டணியின் குறிக்கோளை உணர்த்துகிறது.

வளர்ச்சியை நோக்கிய எங்களின் சாதனைகள், முன்னேற்றத்தை நோக்கிய எங்களின் பார்வைகள் ஒருங்கே ஒரு தாக்கத்தை ஏற்படுத்தி உள்ளன. முன்னேற்றத்திற்கு உத்வேகம் அளிக்கவும், மாநிலத்தின் புகழ்மிக்க கலாசாரத்தை கொண்டாடவும் கிடைத்த ஒரு அங்கீகாரம்.

இவ்வாறு பிரதமர் மோடி கூறி உள்ளார்.