சென்னை: ஐ.டி.எப்., டென்னிஸ் இரட்டையர் பிரிவு பைனலுக்கு இந்தியாவின் ஜீவன், ராம்குமார் ஜோடி முன்னேறியது.

சென்னையில், ஐ.டி.எப்., டென்னிஸ் தொடர் நடக்கிறது. இரட்டையர் பிரிவு அரையிறுதியில் இந்தியாவின் ஜீவன் நெடுஞ்செழியன், ராம்குமார் ராமநாதன் ஜோடி, நெதர்லாந்தின் மேக்ஸ் ஹூக்ஸ், நீல்ஸ் விஸ்கர் ஜோடியை சந்தித்தது. முதல் செட்டை 6-2 எனக் கைப்பற்றிய இந்திய ஜோடி, 'டை பிரேக்கர்' வரை நீடித்த 2வது செட்டை 7-6 என வென்றது.

ஒரு மணி நேரம், 22 நிமிடம் நீடித்த போட்டியில் ஜீவன், ராம்குமார் ஜோடி 6-2, 7-6 என்ற நேர் செட் கணக்கில் வெற்றி பெற்று பைனலுக்குள் நுழைந்தது.

மற்றொரு அரையிறுதியில் இந்தியாவின் பிரஜ்வால் தேவ், நிதின் குமார் சின்ஹா ஜோடி 7-6, 6-7, 11-9 என்ற கணக்கில் ஜப்பானின் இச்சிகவா, இமாமுரா ஜோடியை வீழ்த்தியது.
ஒற்றையர் பிரிவு காலிறுதியில் இந்தியாவின் பிரஜ்வால் தேவ், நெதர்லாந்தின் மேக்ஸ் ஹூக்ஸ் மோதினர். இதில் பிரஜ்வால் 6-7, 4-6 என்ற நேர் செட் கணக்கில் தோல்வியடைந்தார். மற்றொரு காலிறுதியில் இந்தியாவின் சித்தார்த் ரவாத் 4-6, 4-6 என நெதர்லாந்தின் நீல்ஸ் விஸ்கரிடம் வீழ்ந்தார்.