டாவோஸ்: '' காசா அமைதி வாரியத்தில் சேர்வதற்கு அனைத்து நாடுகளும் விருப்பம் தெரிவித்துள்ளன,'' என அமெரிக்க அதிபர் டிரம்ப் கூறியுள்ளார்.


இஸ்ரேல் தாக்குதலால் கடுமையாக பாதிக்கப்பட்டுள்ள காசாவில் அமைதியை ஏற்படுத்துவதற்காக அமைதி வாரியம் என்ற புதிய அமைப்பு ஒன்றை தனது தலைமையில் அமெரிக்க அதிபர் டிரம்ப் உருவாக்கி உள்ளார். இதில் சேர்வதற்கு அனைத்து நாடுகளுக்கும் அழைப்பு விடுத்துள்ளார். ஆனால், சீனா இந்த அமைப்பில் சேர்வதற்கு மறுப்பு தெரிவித்துவிட்டது. பிரிட்டன், பிரான்ஸ் ஆகிய நாடுகள் இந்த அமைப்பில் சேர்வதை நிறுத்திவைத்துள்ளன.


இந்த வாரியத்தின் துவக்க விழா இன்று சுவிட்சர்லாந்தின் டாவோஸ் நகரில் நடந்தது. இதில் டிரம்ப் பேசியதாவது: கடந்த ஓராண்டுக்கு முன்பு இருந்ததை விட இன்றைய உலகம் செல்வச்செழிப்பாகவும், பாதுகாப்பாகவும், இன்னும் அமைதியாகவும் உள்ளது. அனைத்து மோதல்களையும் நிறுத்தி வைத்துள்ளோம். இரண்டு அணுசக்தி நாடுகளான இந்தியா பாகிஸ்தான் இடையிலான மோதலை நிறுத்தியதில் மகிழ்ச்சி. 1 அல்லது 2 கோடி பேரின் உயிரை அதிபர் டிரம்ப் பாதுகாத்தார் என பாகிஸ்தான் பிரதமர் ஷெபாஷ் ஷெரீப் கூறியது எனக்கு பெருமை அளிக்கிறது.


இந்த அமைதி வாரியத்தில் சேர அனைவரும் விரும்புகின்றனர். இது சுமூகமாக செயல்படுகிறது. ஐநா உள்ளட்ட மற்ற அமைப்புகளுடன் இணைந்து செயல்பட விரும்புகிறோம். மத்திய கிழக்கில் அமைதி ஏற்பட வேண்டும் என்ற நோக்கத்திற்காக இந்த அமைதி வாரியத்தில் 59 நாடுகள் பங்கெடுத்துள்ளன.


இதுவரை உருவாக்கப்பட்ட அமைப்புகளில் மிகவும் முக்கியத்துவம் வாய்ந்த ஒன்றாக மாறுவதற்கான சாத்தியக்கூறுகளை இந்த வாரியம் கொண்டுள்ளது. இதற்கு தலைமை தாங்குவதற்கு நான் பெருமைப்படுகிறேன். இது மிகச்சிறப்பாக செயல்பட்டு வருகிறது. ஒவ்வொரு நாடும் இந்த அமைப்பில் அங்கமாக இருக்க விரும்புகிறது. இந்த வாரியம் முழுமையாக அமைக்கப்பட்ட உடன், நாம் விரும்பியதை எல்லாம் செய்ய முடியும். ஹமாஸ் அமைப்பினர் ஆயுதங்களை கீழே போட வேண்டும். இல்லாவிட்டால் அவர்களுக்கு முடிவு கட்டப்படும். இதற்கான அறிவிப்பை அந்த அமைப்பினர் 2 அல்லது 3 வாரங்களில் வெளியிட வேண்டும்.இவ்வாறு அவர் கூறினார்.

இந்த வாரியத்தில் இணைந்த நாடுகள்

* பஹ்ரைன்

*மொராக்கோ

*அர்ஜென்டினா

*ஆர்மேனியா

*அஜர்பைஜான்

*பல்கேரியா

*ஹங்கேரி

*இந்தோனேஷியா

*ஜோர்டான்

*கஜகிஸ்தான்

*கொசாவோ

*பாகிஸ்தான்

*பராகுவே

*கத்தார்

*சவுதி அரேபியா

*துருக்கி

*ஐக்கிய அரபு எமீரேட்ஸ்

*உஸ்பெகிஸ்தான்

*மங்கோலியா

தற்போதைக்கு இந்த வாரியத்தில் சேர்வதை நிறுத்திவைத்துள்ள நாடுகள்


*பிரான்ஸ்

*நார்வே

*ஸ்லோவேனியா

*சுவிடன்

*பிரிட்டன்