விருதுநகர்: கொள்கை, லட்சியம் என்றால் என்ன தெரியாத கூட்டம் ஒன்று இங்கே சுற்றிக் கொண்டு இருக்கிறது என்று தவெகவை துணை முதல்வர் உதயநிதி மறைமுகமாக தாக்கி பேசினார்.

விருதுநகர் கல்குறிச்சியில் திமுக இளைஞரணி மாநாட்டில் அவர் பேசியதாவது;

கொள்கை, லட்சியம் தெரியாமல் வெற்றுக் கூச்சல் போட்டுக் கொண்டு இருக்கும் கூட்டத்தால் தமிழகத்திற்கு எந்த பயனும் கிடையாது. இதனால் அவர்களுக்கே எந்த பயனும் கிடையாது. தேர்தல், தேர்தல் திருவிழா என்றால் தமிழகத்தில் புதிது, புதியதாக கடை விரிக்க ஆரம்பித்து விடுகின்றனர்.

தேர்தல் முடிந்தவுடன் அந்த கடை அனைத்தும் காலியாகிவிடும். எந்த கட்டமைப்பு பலம் இல்லாமல், எந்த கட்டுப்பாடும் இல்லாமல் கொள்கை என்றால் என்ன? லட்சியம் என்றால் என்ன எதுவுமே தெரியாமல், வெற்றுக் கூச்சல் போடுகிற கூட்டம் இன்றைக்கு தமிழகத்தில் சுற்றிக் கொண்டு இருக்கிறது. இதனால் தமிழகத்திற்கு எந்தவித பயனும் கிடையாது.

இன்னும் சொல்லப்போனால் அவர்களால் அவர்களுக்கே எந்த பயனும் கிடையாது. இதை தமிழக மக்கள் விரைவில் உணர்த்துவார்கள். அதேபோல திருவிழா நேரத்தில் புது, புது கடைகள் எல்லாம் போடுவார்கள். மக்களை கூப்பிட்டு பொய் விளம்பரங்களை சொல்லி, பொய் வியாபாரம் எல்லாம் பண்ணுவார்கள். பலூன் எல்லாம் ஊதி, குழந்தைகளுக்கு விளையாட்டு காட்டுவார்கள்.

அதுமாதிரி தான் இன்றைக்கு தேர்தல், தேர்தல் திருவிழா என்றாலே தமிழகத்தில் புதுசு, புதுசாக கடை விரிக்க ஆரம்பித்து இருக்கின்றனர். திருவிழா அன்றைக்கு போடப்படும் கடைகள், திருவிழா முடிந்த பின்னர் காணாமல் போய்விடும். அதே போல தேர்தல் முடிந்தவுடன் அந்த கடைகள் அனைத்தும் காலியாகிவிடும்.

ஆனால் திமுக மட்டுமே என்றைக்கும் மக்களோடு மக்களோடு நின்று கொண்டு இருக்கிறது. திருவிழாவில் பிள்ளை பிடிப்பவர்,மிட்டாய், சாக்லேட் வாங்கி தருவேன் என்று உள்ளே வருவார்கள். அதேமாதிரி அமலாக்கத்துறை வழக்கில் இருந்து காப்பாத்துகிறேன், பெரா வழக்கில் இருந்து காப்பாத்துகிறேன், மருத்துவக் கல்லூரி ஊழல் வழக்கில் இருந்து நான் உங்களை காப்பாற்றுகிறேன் என இப்படி கேசை எல்லாம் காட்டி, காட்டி இன்றைக்கு அடிமைக் கூட்டத்தை பாசிஸ்ட்டுகள் தூக்கி இருக்கின்றனர்.

இந்த மிரட்டலுக்கு எல்லாம் அடிமை அதிமுக பயப்படலாம், ஆனால் திமுக தொண்டன் எந்த உருட்டல், மிரட்டலுக்கு எல்லாம் பயப்பட மாட்டான், ஏன் என்றால் எங்களை வழிநடத்துவது ஸ்டாலின் என்ற மகத்தான தலைவர். பாசிஸ்டுகள் எவ்வளவு முயற்சி செய்தாலும் சரி, தமிழகம் உங்கள் கைகளில் சிக்காது. தமிழகம் என்றைக்குமே டில்லிக்கு அவுட் ஆப் கண்ட்ரோல் தான்.

இவ்வாறு உதயநிதி பேசினார்.