மும்பை: மும்பை வான்கடே மைதானத்தில் நேற்று நடந்த 'டி-20' உலக கோப்பை லீக் போட்டியில் (சி பிரிவு) ஸ்காட்லாந்து, நேபாள அணிகள் மோதின. 'டாஸ்' வென்ற நேபாள அணி பீல்டிங் செய்தது.
ஸ்காட்லாந்து அணிக்கு மைக்கேல் ஜோன்ஸ், முன்சே (27) ஜோடி நல்ல துவக்கம் கொடுத்தது. ஜோன்ஸ், 45 பந்தில் 71 ரன் எடுத்து அவுட்டானார். பிரண்டன் மெக்முல்லன் 25 ரன் எடுத்தார். கேப்டன் ரிச்சி பெர்ரிங்டன் (10) தவிர, மற்ற வீரர்கள் ஒற்றை இலக்க ரன்னில் திரும்பினர்.
இருப்பினும், ஸ்காட்லாந்து அணி 20 ஓவரில் 170/7 ரன் குவித்தது. நேபாளத்தின் சார்பில் சோம்பால் காமி 3, நந்தன் யாதவ் 2 விக்கெட் சாய்த்தனர். அடுத்து களமிறங்கிய நேபாள அணிக்கு குஷால் (43), ஆசிப் (33) ஜோடி நல்ல துவக்கம் தந்தது. கேப்டன் ரோகித் (16), சற்று உதவினார். திபேந்திர சிங் (50*) அரைசதம், குல்சன் (24*) விளாசல் கைகொடுக்க நேபாள அணி 19.2 ஓவரில் 171/3 ரன் எடுத்தது.
'டி-20' உலக கோப்பை அரங்கில் முதல் வெற்றி பெற்றது.