புதுடில்லி: மிதக்கும் சூரிய மின்சார உற்பத்தி திட்டங்களுக்கு நீர்நிலைகளை அடையாளம் கண்டு தெரிவிக்குமாறு மாநில அரசுகளுக்கு மத்திய அரசு அழைப்பு விடுத்துள்ளது.

நம் நாட்டில் மிதக்கும் சூரிய ஒளி மின்சார உற்பத்தியை அதிகரிக்கும் நோக்கில், நீர்நிலைகளை அடையாளம் கண்டு முன்னுரிமை வழங்குமாறு மாநிலங்களுக்கு புதிய மற்றும் புதுப்பிக்கத்தக்க எரிசக்தி அமைச்சகம் அறிவுறுத்தியுள்ளது.

தற்போது இந்தியாவில் கிட்டத்தட்ட 700 மெகாவாட் திறன் கொண்ட மிதக்கும் சூரிய மின் திட்டங்கள் மட்டுமே செயல்பாட்டில் உள்ளன.

ஆனால் உலக வங்கி மதிப்பீட்டின்படி, இந்தியாவில் 280 முதல் 300 ஜிகாவாட் வரை மிதக்கும் சூரிய மின் உற்பத்தி திறன் இருப்பதாக கணிக்கப்பட்டுள்ளது.

இந்த நிலையில், மிதக்கும் சூரிய மின்சார உற்பத்தி திறன் மதிப்பீட்டு அறிக்கை குறித்து, கடந்த 20ம் தேதி, புதுப்பிக்கத்தக்க எரிசக்தி அமைச்சகம் ஆலோசனை கூட்டம் நடத்தியது.

தேசிய சூரிய எரிசக்தி நிறுவனமான நைஸ் மற்றும் ஐ.ஐ.டி., ரூர்கேலா ஆகியவற்றால் தயாரிக்கப்பட்ட இத்திட்டத்துக்கான வரைவு அறிக்கைகள் பார்வைக்கு இடம்பெற்றன.

மாநிலங்களின் கருத்துகளை அடிப்படையாக கொண்டு மிதக்கும் சூரிய மின் உற்பத்தி கொள்கை குறித்து சுற்றுச்சூழல் அமைச்சகம், தேசிய ஈரநில ஆணையம் மற்றும் தேசிய அணைகள் பாதுகாப்பு ஆணையம் ஆகியவற்றுடன் விரிவான ஆலோசனைகள் மேற்கொள்ளப்படும் என கூட்டத்தில் புதுப்பிக்கத்தக்க எரிசக்தி அமைச்சகம் தெரிவித்துள்ளது.

புதுப்பிக்கத்தக்க எரிசக்தி திட்டங்களை செயல்படுத்த நிலப்பரப்பு பற்றாக்குறை அதிகரித்து வரும் நிலையில், நீர்நிலைகளின் மீது சூரிய மின் உற்பத்தி திட்டங்கள் மாற்று வாய்ப்பாக உருவெடுத்துஉள்ளன.

ஆனால், சாத்தியமான இடங்கள் குறித்த தரவுகள் இல்லாமை மற்றும் திட்ட செயல்பாட்டு கட்டமைப்பு பற்றாக்குறை காரணமாக இத்திட்டங்களின் வளர்ச்சி மந்தமாக இருப்பதாக அமைச்சகம் குறிப்பிட்டுள்ளது.

இதையடுத்து, மிதக்கும் சூரிய மின் திட்டங்களை முன்னெடுக்க மாநிலங்கள் மற்றும் யூனியன் பிரதேசங்கள் தகுந்த நீர்நிலைகளை அடையாளம் கண்டு முன்னுரிமை வழங்கலாம் என்று மத்திய அரசு அறிவுறுத்திஉள்ளது.