திருப்பூர்: கலெக்டர் அலுவலக வளாகத்தில், திங்கட்கிழமை நடக்கும் பொதுமக்கள் குறைகேட்பு கூட்டம்; வெள்ளிக்கிழமை நடக்கும் மாற்றுத்திறனாளிகள் சிறப்பு முகாம்களுக்கு வரும், முதியோர், மாற்றுத்திறனாளிகள் பயன்பெறும் வகையில், 'பேட்டரி' வாகனம் ஏற்பாடு செய்யப்பட்டது.

தனியார் அமைப்புகள் பங்களிப்புடன், 'பேட்டரி' வாகனம் இலவசமாக வழங்கப்பட்டது. கலெக்டர் அலுவலக பணியாளர்கள், அவற்றை, இயக்கி வந்தனர். குறிப்பாக, திங்கள் மற்றும் வெள்ளிக்கிழமை இயக்கியதால், முதியோர், மாற்றுத்திறனாளிகள் பயனடைந்தனர். இந்நிலையில், சிறிய பழுது காரணமாகவும், வாகனத்தை இயக்க ஆட்கள் இல்லாமலும், வாகனம் பல மாதங்களாக பயன்பாடின்றி நிறுத்தி வைக்கப்பட்டுள்ளது.

முதியோர் மற்றும் மாற்றுத்திறனாளிகள் வசதிக்காக, 'பேட்டரி' வாகனத்தை மீண்டும் பயன்படுத்த வேண்டும். தேர்தல் காலத்தில், கலெக்டர் அலுவலகத்தில் பயன்பாடு குறைந்தாலும், அரசு மருத்துவமனை போன்ற பகுதியில்தற்காலிகமாக பயன்படுத்த வழங்கலாம் என, பொதுமக்கள் வலியுறுத்தியுள்ளனர்.