திருமங்கலம்: ஓடிக்கொண்டிருக்கும்போதே திடீரென கால்கள் செயலிழந்த நிலையிலும், பஸ்சை சாமர்த்தியமாக நிறுத்தி பயணிகளை பாதுகாத்த டிரைவரை பொதுமக்கள் பாராட்டினர்.

ராஜபாளையத்தில் இருந்து மதுரைக்கு அரசு பஸ்சை டிரைவர் சரவணன் 50, ஓட்டி வந்தார். பஸ்சில் 26 பயணிகள் இருந்தனர். திருமங்கலம் ஆலம்பட்டி தனியார் பள்ளி அருகே வந்தபோது டிரைவருக்கு உடல்நலக் குறைவு ஏற்பட்டது. அவரது இடது கால் திடீரென செயல் இழந்தது.

சுதாரித்த டிரைவர் சரவணன் பஸ்சை மெதுவாக இயக்கி ரோட்டின் ஓரத்தில் நிறுத்திய நிலையில் மயங்கி விழுந்தார். இதைப் பார்த்த கண்டக்டர் ரமேஷ் மற்றும் பயணிகள் சரவணனை பத்திரமாக பஸ்சில் இருந்து இறக்கி முதலுதவி சிகிச்சை அளித்தனர். அந்த வழியாக வந்த காரில் திருமங்கலம் அரசு மருத்துவமனைக்கு சிகிச்சைக்காக அனுப்பி வைத்தனர். திடீர் உடல் நலக்குறைவு ஏற்பட்ட போதும், சாதுர்யமாக செயல்பட்டு பயணிகளின் உயிரை காத்த டிரைவரை பயணிகள், பொதுமக்கள் பாராட்டினர்.