தமிழக சட்டசபை தேர்தல் அறிவிப்பு கடந்த, 15ல் வெளியானதை அடுத்து, நடத்தை விதிகளும் உடனே அமலுக்கு வந்துவிட்டது. அதன்படி சேலம் மாவட்டத்தில் அரசியல் கட்சி தலைவர்களின் சிலைகள் துணிகளால் மூடப்பட்டன. கட்சி பேனர்கள், போஸ்டர்கள் அகற்றப்பட்டன. தலைவர்களின் படங்கள், பெயர் பொறித்த கல்வெட்டுகள் மறைக்கப்பட்டன.


அதேபோல் சேலம் பழைய பஸ் ஸ்டாண்ட் அருகே, சேலம் தெற்கு தொகுதி எம்.எல்.ஏ., பாலசுப்ரமணியம் அலுவலகமும், அறிவிப்பு வெளியான இரவு அன்று, பொதுப்பணித்துறையினரால் பூட்டி சீல் வைக்கப்பட்டது. ஆனால் அலுவலக முகப்பின் மேற்பகுதியில், எம்.ஜி.ஆர்., - ஜெயலலிதா - பாலசுப்ரமணியம் படம் போட்ட விளம்பர பலகையை அகற்றாமல் சென்றுவிட்டனர். இதுகுறித்து புகார் எழுந்தது. அதன் எதிரொலியாக பொதுப்பணித் துறையினர், மாநகராட்சி ஊழியர்கள், நேற்று முன்தினம் இரவு, அந்த பேனரை அகற்றினர்.