கிரனடா: உலக கோப்பை துப்பாக்கிசுடுதலில் உலக சாதனை படைத்து, தங்கம் வென்றது இந்தியாவின் பாலக்-முகேஷ் ஜோடி.
ஸ்பெயினின் கிரானடாவில், உலக கோப்பை துப்பாக்கி சுடுதல் ('ரைபிள்'/'பிஸ்டல்') தொடர் நடக்கிறது. நேற்று 10 மீ., ஏர் பிஸ்டல் கலப்பு அணிகளுக்கான போட்டி நடந்தது. இந்தியா சார்பில், பாரிஸ் ஒலிம்பிக்கில் பங்கேற்ற பாலக்-ஜூனியர் உலக சாம்பியன் முகேஷ் ஜோடி, தகுதிச்சுற்றில் 581 புள்ளி எடுத்து, 2வது இடம் பெற்று பைனலுக்கு முன்னேறியது.
இந்தியாவின் சைன்யம், உஜ்ஜவால் ஜோடி (576) 9வது இடம் பெற்று வெளியேறியது. பைனலில் இந்திய ஜோடி, தகுதிச்சுற்றில் முதலிடம் பெற்ற, நடப்பு உலக சாம்பியனாக களமிறங்கிய சீனாவின் குயான்ஜன், காய் ஹு ஜோடியை எதிர்கொண்டது.
இதில் இந்திய ஜோடி 487.7 புள்ளி எடுத்து புதிய உலக சாதனை படைத்து, தங்கம் வென்றது. தவிர, ஜூனியர் பிரிவிலும் இது உலக சாதனை ஆனது. சீனா (வெள்ளி), ஹங்கேரி (வெண்கலம்) அடுத்த இரு இடம் பெற்றன.