தி.மு.க., வேட்பாளரை கண்டு, 100 நாள் வேலை திட்ட பெண்கள் பலரும் அலறியடித்து ஓடுவதால், அக்கட்சியினர் அதிர்ச்சி அடைந்துள்ளனர்.

மாதவரம் தொகுதியில், தற்போதைய எம்.எல்.ஏ.,வாக இருப்பவர் சுதர்சனம். ம.தி.மு.க.,வில் இருந்து வந்த அவர், தொடர்ந்து இருமுறை வென்று மூன்றாவது முறையாக தி.மு.க., சார்பில் போட்டியிடுகிறார். சிக்கனமாக செலவு செய்யக்கூடியவர் என்று, கட்சி நிர்வாகிகளிடம் பெயரெடுத்தவர்.

நிகழ்ச்சிகளுக்கு செல்லும்போது, சாலையோரங்களில் பணியில் உள்ள 100 நாள் திட்ட பெண் தொழிலாளர்கள், துப்புரவு பெண் தொழிலாளர்களை சந்திப்பது வழக்கம்.

தனது காரில் இருந்து, ஐந்து ரூபாய் 'மேரி பிஸ்கட் பாக்கெட்' எடுத்து கொடுத்து சாப்பிட சொல்லி, நீண்ட நேரம் அவர்களுடைய சொந்த பிரச்னைகள், குடும்ப கஷ்டங்கள் குறித்து கேட்டறிவார். ஆனால், எந்த குறையையும் சரிசெய்ய உதவ மாட்டார். மணிக்கணக்கில் பேசுவதால், அவரது கார் அவ்வழியாக சென்றால், 100 நாள் திட்ட பெண்கள், குளத்திற்குள்ளும், புதர்களுக்குள்ளும் இறங்கி சென்று பணி செய்வது போல பாவனை காட்டுவர்.

எம்.எல்.ஏ., சென்ற பின், மீண்டும் வெளியே வந்து, சாலையோர மரத்தடியில் அமர்ந்து கொள்வர். பிரசாரத்திற்காக எம்.எல்.ஏ., தொகுதி பக்கம் வரும்போது, 'மேரி பிஸ்கட் அண்ணன் வர்றாரு ஓடுங்கடி' என, பெண் தொழிலாளர்கள் ஓட்டம் பிடிக்கின்றனர்.

பிரசாரத்திற்கு உடன் வந்தால் சிறப்பான கவனிப்பு நடக்கும் என, கட்சி நிர்வாகிகள் கூறினாலும் கூட, 'அவரை பற்றி எங்களுக்கு தெரியாதா' என கூறிவிட்டு பெண்கள் ஒதுங்கி விடுகின்றனர்.