நமது நிருபர்

ரூ.8 ஆயிரம் கூப்பன் மாடல் வினியோகத்துக்கு தேர்தல் கமிஷன் அனுமதி பெற்றுள்ளதாக திமுக பிரசாரம் செய்வது உண்மைக்கு புறம்பானது; தவறாக வழி நடத்தக்கூடியது என தேர்தல் கமிஷன் கண்டிப்புடன் தெரிவித்துள்ளது.

தி.மு.க., தேர்தல் அறிக்கையில், 'இல்லத்தரசி திட்டம்' என்ற பெயரில், குடும்ப தலைவிகளுக்கு, 8,000 ரூபாய் மதிப்புள்ள கூப்பன் வழங்கப்படும் எனவும் அதை பயன்படுத்தி, வாஷிங் மெஷின், பிரிஜ், மிக்ஸி, கிரைண்டர் போன்ற வீட்டு உபயோகப் பொருட்களை வாங்கிக் கொள்ளலாம் எனவும் கூறப்பட்டுள்ளது.


இது பற்றி மக்கள் மத்தியில் நம்பிக்கை ஏற்படுத்தும் நோக்கத்துடன் திமுகவினர் வீடு வீடாக கூப்பன் வினியோகம் செய்கின்றனர். பல இடங்களில் தேர்தல் பறக்கும் படையினரிடம் இத்தகைய கூப்பன்கள் பிடிபட்டுளளன. சில இடங்களில் கூப்பன் வினியோகத்துக்கு எதிர்க்கட்சியினர் ஆட்சேபம் தெரிவித்து தகராறு செய்கின்றனர்.

இந்நிலையில் சமூக வலைதளத்தில் திமுகவை சேர்ந்த ஒருவர் ரூ.8 ஆயிரம் கூப்பன் மாடல் வினியோகம் என பதிவிட்டு, ''பொதுமக்களிடம் ரூ.8,000 கூப்பன் மாடல் தந்து ஓட்டு சேகரிக்க இந்தியத் தேர்தல் கமிஷனிடம் முறையான அனுமதி பெற்றுள்ளது திமுக. மாற்றுக்கட்சியினர் பிரச்னை செய்தால் அனுமதி நகலைக் காட்டவும்'' என கூறியிருந்தார். அனுமதி கடிதம் என்று கூறி ஒரு கடிதத்தையும் வெளியிட்டிருந்தார்.

அந்த பதிவுக்கு பதில் அளித்து தமிழக தலைமை தேர்தல் அதிகாரி வெளியிட்ட பதிவில் கூறியிருப்பதாவது: மின்னணு ஊடகங்களில்(Electronic media) உள்ளடக்கங்களை ஒளிபரப்புவதற்காக மட்டுமே அனுமதி வழங்கப்பட்டது என இதன்மூலம் தெளிவுபடுத்தப்படுகிறது. இச்சான்றிதழ், அச்சிடப்பட்ட பிரசுரப் பொருட்கள், குறிப்பாக துண்டுப் பிரசுரங்கள் அல்லது கைப்பிரதிகள் (handbills) ஆகியவற்றிற்கு பொருந்தாது.



அத்தகைய அச்சிடப்பட்ட பொருட்கள் அனைத்தும் இந்திய மக்கள் பிரதிநிதித்துவ சட்டம், 1951ன் பிரிவு 127A மற்றும் நடைமுறையில் உள்ள மாதிரி நடத்தை விதிமுறைகள் ஆகியவற்றைப் பின்பற்றி தயாரிக்கப்பட்டிருக்க வேண்டும். தேர்தல் கமிஷன் அனுமதி பெற்றுள்ளதாக கூறுவது உண்மைக்கு புறம்பானது. தவறாக வழி நடத்தக்கூடியது. இவ்வாறு தேர்தல் கமிஷன் கூறியுள்ளது.