இப்பகுதியில் கடந்த மார்ச் 12ம் தேதி உடல் பருமனை குறைப்பதற்கான யோகா சிகிச்சையில், சூர்ய நமஸ்காரத்தின் 12 நிலைகளின் ஆசன செயல் விளக்கங்களை பார்த்தோம். பிற ஆசன நிலைகளை இந்த வாரம் பார்ப்போம்.

திரிகோண ஆசனம் சமஸ்திதி ஆசனத்தில் நிற்கவும். உங்கள் கால்களை இரண்டு அல்லது மூன்று அடி இடைவெளியில் பக்கவாட்டில் முன்னே பார்த்தவாறு வைக்கவும்.

கைகளை பக்கங்களில் மார்பை எதிர் திசைகளில் இழுக்குமாறு நீட்டவும். தலையையும், வலது காலையும் வலது பக்கமாகத் திருப்பி, வலது கையை வலது பாதத்திற்கு மெதுவாகக் கொண்டு வந்து, வலது கையின் உள்ளங்கையை வலது பாதத்தின் முன் தரையில் வைக்கவும்.

இடது கையின் நடுப்பகுதியை மேலே பார்க்கவும். இதனால் முழு உடற்பகுதியும் ஒரு நல்ல திருப்பம் மற்றும் நீட்சியம் பெறும். 30 விநாடிகள் இந்த நிலையில் ஆழ்ந்து சுவாசிக்கவும். பின்னர் மெதுவாக, கைகள் திறந்த நிலையில் மேலே வந்து, இடது பாதத்தின் முன் இடது கையை கீழே வைத்து எதிர் பக்கத்தில் செய்யவும். 30 விநாடிகள் இந்த நிலையில் ஆழ்ந்து சுவாசிக்கவும்.

மெதுவாக மீண்டும் சமஸ்திதி ஆசனத்திற்கு வந்து சில சுற்றுகள் ஆழ்ந்த மூச்சுடன் ஓய்வெடுக்கவும்.

நவ ஆசனம் கைகளை பக்கவாட்டில் வைத்து ஷவாசனத்தில் படுத்து கொள்ளுங்கள். மூச்சை உள்ளிழுத்துக் கொண்டு, மெதுவாக உட்டானா ஆசனத்திற்கு வரவும். மூச்சை உள்நிறுத்தி. கால்விரல்கள் மூக்குடன் நேராக வரும் வரை இரண்டு கால்களையும் தரையில் இருந்து உயர்த்தவும். இது நவாசனம், படகு நிலை.

கைகள் தொடைகளுக்கு மேலே. உடலுக்கு நெருக்கமாக இருக்குமாறு வைக்க வேண்டும். மூச்சை விட்டுக்கொண்டே, மெதுவாக கால்களை தரையில் இறக்கி, பின் சாய்ந்து பின் முதுகுத்தண்டின் ஒவ்வொரு முதுகெலும்பையும் தரையில் படுமாறு படுக்கவும். இன்னும் இருமுறை முறை செய்துவிட்டு ஷவாசனத்தில் ஆழ்ந்த சுவாசத்துடன் ஓய்வெடுக்கவும்.

நவ ஆசனத்தின் தொடர் பயிற்சி மூலம் வயிறு மற்றும் தொடை தசைகள் ஆரோக்கியமான முறையில் வலுப்படுத்தப்படுகின்றன. இந்தநிலையில் ஏற்படும் ஆரோக்கியமான இறுக்கத்தால் இடுப்பு பகுதிக்கு ஒரு அதிக அளவிலான இரத்தம் அனுப்பப்படுகிறது.

ஹலாசனம் ஷாவாசனத்திலிருந்து மூச்சை உள்ளிழுத்துக் கொண்டு இரு கால்களையும் வானத்தை நோக்கி உயர்த்தவும். கால்விரல்கள் தலைக்கு பின்புறம் தரையைத் தொடும் வரை கால்களை மடக்காமல் கொண்டுவரவும். கைகளை பின்னால் நீட்டவும் அல்லது முழங்கைகளை தரையில் வைத்து கீழ் முதுகில் பிடிக்கவும். லேசான சுவாசத்துடன் இந்த நிலையில் சில வினாடிகள் வைத்திருங்கள். பின்னர் மூச்சை வெளியே விட்டுக்கொண்டு கால்களை தரையில் இறக்கவும்.

ஹலாசனத்தை குறைந்தபட்சம் மூன்று முறை செய்யவும், பயிற்சியை செய்ய செய்ய நீண்ட நேரம் இந்த நிலையில் இருக்க முடிவதை உணரலாம். ஷவாசனத்திற்குத் திரும்பவும், கழுத்தில் குவிந்திருக்கும் அழுத்தத்தையும் குறைக்க உங்கள் தலையை இரு பக்கங்களும் மாறி மாறி திருப்பவும்.கழுத்து வலி உள்ளவர்கள் இந்த ஆசனத்தை செய்யக்கூடாது. ஏனெனில் இது கழுத்து வலியை அதிகமாக்கும்.

சூர்ய பேதன பிராணாயாமம் வஜ்ராசனத்தில் அமர்ந்து உங்கள் வலது கையில் நாசக்ரா முத்திரை செய்யவும். மோதிர விரலால் உங்கள் இடது நாசியை மூடி நான்கு எண்ணிக்கைக்கு வலது நாசி வழியாக மெதுவாக மூச்சை உள்ளிழுக்கவும்.

வலது நாசியை மூடி, இடது நாசி வழியாக எட்டு எண்ணிக்கைக்கு மூச்சை வெளியே விடவும். ஒவ்வொரு முறையும் குறைந்தபட்சம் ஒன்பது சுற்றுக்களுக்கு சூரிய பேதன பிராணயாமாவை செய்யவும். இந்த பிராணயாமா உடல் வளர்சிதை மாற்றத்தை அதிகரிக்கிறது அதிகப்படியான கலோரிகளை எரிக்க உதவுகிறது.

இனி வளர்சிதை மாற்றக் கோளாறுக்கான யோகா சிகிச்சை முறைகளை அடுத்த வாரம் பார்ப்போம்....