ஒரகடம்: ஒரகடம் அருகே, சட்டசபை தேர்தல் ஓட்டுப்பதிவின்போது, அ.தி.மு.க., நிர்வாகியை தாக்கியதாக, அப்பகுதி மக்கள் ஒரகடம் காவல் நிலையத்தை முற்றுகையிட்டு போராட்டத்தில் ஈடுபட்டனர்.

தமிழகம் முழுதும் நேற்று முன்தினம் சட்டசபை தேர்தல் விறுவிறுப்பாக நடந்து முடிந்தது. இதன் ஒருபகுதியாக, ஒரகடம் அருகே எழிச்சூர் கிராமத்தில், ஊராட்சி ஒன்றிய துவக்கப் பள்ளியில் வாக்காளர்கள் ஓட்டுகளை செலுத்தினர்.

இந்த நிலையில், எழிச்சூர் பகுதியைச் சேர்ந்த காஞ்சிபுரம் மாவட்ட அ.தி.மு.க., அம்மா பேரவை துணை செயலர் முரளிகிருஷ்ணன் ஓட்டுச்சாவடி அருகே கட்சியினருடன் நின்றிருந்தார்.

அப்போது, அங்குவந்த அதே பகுதியைச் சேர்ந்த ஆகாஷ், முரளி கிருஷ்ணனிடம் தகராறில் ஈடுபட்டார். இருவருக்கும் வாக்குவாதம் முற்றியது. இதையடுத்து, முரளி கிருஷ்ணனை ஆகாஷ் தாக்கியதாக கூறப்படுகிறது.

இதனால், ஆத்திரமடைந்த அப்பகுதி மக்கள் 100க்கும் மேற்பட்டோர், நேற்று முன்தினம் நள்ளிரவு ஒரகடம் காவல் நிலையத்தை முற்றுகையிட்டனர். தாக்குதல் நடத்திய ஆகாஷை கைது செய்ய வேண்டும் என, காவல் நிலையம் முன் அமர்ந்து போராட்டத்தில் ஈடுபட்டனர்.

தாக்குதல் நடத்தியவர் மீது உரிய நடவடிக்கை எடுக்கப்படும் என, போலீசார் உறுதி அளித்ததால், அவர்கள் அங்கிருந்து கலைந்து சென்றனர்.