புதுடில்லி: மேற்குவங்கத்தில் காங்கிரஸ் தொண்டர் தேப்தீப் சாட்டர்ஜி கொலையை ராகுல் கண்டித்ததோடு, மம்தா தலைமையிலான திரிணமுல் காங்கிரஸ் அராஜக ஆட்சி, குண்டர் ஆட்சி' என விமர்சித்துள்ளார்.

இது குறித்து காங்கிரஸ் எம்பியும், லோக்சபா எதிர்க்கட்சி தலைவருமான ராகுல் வெளியிட்டுள்ள பதிவில் கூறியிருப்பதாவது: தேர்தலுக்குப் பிறகு திரிணமுல் காங்கிரஸுடன் தொடர்புடைய குண்டர்களால் காங்கிரஸ் தொண்டர் தேப்தீப் சாட்டர்ஜி கொலை செய்யப்பட்டது முற்றிலும் கண்டிக்கத்தக்கது. அவரது குடும்பத்தினருக்கு ஆழ்ந்த இரங்கல் தெரிவித்து கொள்கிறேன். இன்று மேற்கு வங்கத்தில் ஜனநாயகம் நிலவவில்லை, மாறாக திரிணமுல் காங்கிரஸின் குண்டர் ஆட்சியே நிலவுகிறது.



எதிர்ப்புக் குரல்களை அச்சுறுத்துவதும், தாக்குவதும், ஒடுக்குவதும் திரிணமுல் காங்கிரஸின் அடையாளமாகிவிட்டது. காங்கிரஸின் அரசியல் ஒருபோதும் வன்முறையில் வேரூன்றியதில்லை, இனியும் இருக்காது. நாங்களும் எங்கள் தொண்டர்களை இழந்துள்ளோம், ஆனாலும் நாங்கள் எப்போதும் அகிம்சை மற்றும் அரசியலமைப்புவாதப் பாதையையே தேர்ந்தெடுத்துள்ளோம். இதுவே எங்கள் பாரம்பரியம், இதுவே எங்கள் உறுதி.


குற்றவாளிகள் அனைவரையும் உடனடியாகக் கைது செய்ய வேண்டும், கடுமையான தண்டனை வழங்க வேண்டும், மேலும் தேப்தீப்பின் குடும்பத்திற்கு முழுப் பாதுகாப்பும் இழப்பீடும் வழங்கப்படுவதை உறுதி செய்ய வேண்டும். இந்தியாவின் அகிம்சைப் பாரம்பரியத்தைக் களங்கப்படுத்தும் இந்த அரசியலுக்கு நாங்கள் தலைவணங்க மாட்டோம். நீதி வழங்கப்படும். இவ்வாறு ராகுல் கூறியுள்ளார்.