தேவதானப்பட்டி: தேனி, திண்டுக்கல் மாவட்ட மக்களின் குடிநீர் குடிநீர் தேவையை பூர்த்தி செய்ய மஞ்சளாறு அணையிலிருந்து நேற்று வினாடிக்கு 300 கன அடி வீதம் தண்ணீர் திறக்கப்பட்டது.

தேவதானப்பட்டி அருகே மஞ்சளாறு அணையில் கடந்தாண்டு வடகிழக்கு பருவமழை போதியளவு பெய்யாததால் அணை அதன் முழு கொள்ளளவு (55 அடி) எட்டவில்லை. இதனால் உபரி நீர் திறக்கவில்லை. பத்து மாதங்களுக்கும் அதிகமாக உபரி நீர் செல்லாததால், மஞ்சளாறு ஆற்றுப்பகுதி வறண்டது. இதனால் அவ்வப்போது குடிநீர் தட்டுப்பாடு, நிலத்தடி நீர்மட்டம் பாதித்தது. தற்போது வெயிலின் தாக்கம் அதிகரித்துள்ளதால் குடிநீர் ஆதாரங்களில் தண்ணீர் இல்லை. இதனால் தேனி, திண்டுக்கல் மாவட்டங்களில் உள்ள மஞ்சளாறு கரையோரப்பகுதி மக்களுக்கு குடிநீர் தட்டுப்பாடு உருவாகி உள்ளது.

தமிழக அரசு உத்தரவில், நேற்று முதல் மே 3 வரை நான்கு நாட்களுக்கு வினாடிக்கு 300 கன அடி வீதம் மஞ்சளறு அணையில் இருந்து தண்ணீர் திறக்கப்பட்டது. அணையில் நேற்றைய நீர்மட்டம் 41.40அடி.

உதவி பொறியாளர் கமலக்கண்ணன் மேற்பார்வையில் தண்ணீர் திறக்கப்பட்டது.இதனால் தேனி மாவட்ட பகுதியான தேவதானப்பட்டி, கெங்குவார்பட்டி, ஜி.கல்லுப்பட்டி மற்றும் திண்டுக்கல் மாவட்ட பகுதியான தும்மலப்பட்டி மற்றும் வத்தலக்குண்டு முதல் சிவஞானபுரம் வரையில் பொதுமக்களின் குடிநீர் தேவை பூர்த்தியாகும். மஞ்சளாற்றில் தண்ணீர் செல்வதால் ஆற்றங்கரையோரம் மக்கள் ஆற்றில் இறங்குவது, குளிப்பதை தவிர்க்க வேண்டும். ஆற்றங்கரையில் கால்நடைகளை மேய்ச்சலுக்கு விட வேண்டாம் என பொதுப்பணித்துறை எச்சரிக்கை விடுத்துள்ளனர்.