திருவொற்றியூர்: ‘காஸ்’ சிலிண்டர் விலை உயர்வை கண்டித்து, மகிளா காங்கிரஸ் சார்பில் ஒப்பாரி வைத்து நுாதன போராட்டம் நடத்தப்பட்டது.

மத்திய அரசு, பெட்ரோல், 3.14 ரூபாய்; டீசல் 3.11 ரூபாய் விலை உயர்த்தியது. இதைத்தொடர்ந்து, அத்தியாவசிய பொருட்களின் விலை உயர்ந்து மக்கள் பாதிக்கப்படுவதாக கண்டித்து, மகிளா காங்கிரஸ் சார்பில், நேற்று காலை திருவொற்றியூர் – தேரடி தபால் நிலையம் அருகே, கண்டன ஆர்ப்பாட்டம் நடந்தது.

தமிழ்நாடு மகிளா காங்கிரஸ் தலைவர் ராமலெட்சுமி, வடசென்னை கிழக்கு மாவட்ட தலைவர் தாரணி திரவியம் ஆகியோர் தலைமையில், 50க்கும் மேற்பட்ட பெண்கள் பங்கேற்று, ஸ்கூட்டர் மற்றும் ‘காஸ்’ சிலிண்டருக்கு மாலை அணிவித்து, ஒப்பாரி வைத்து ஆர்ப்பாட்டம் நடத்தினர்.

மேலும், பெட்ரோல் – டீசல் மற்றும் காஸ் சிலிண்டர் விலை உயர்வை கண்டித்து, கோஷங்கள் எழுப்பினர். பின், பெண்களுக்கு, 33 சதவீதம் இடஒதுக்கீடு கோரி, எழுதிய கடிதத்தை பிரதமருக்கு அனுப்பி வைத்தனர்.

பெண்களின் திடீர் ஒப்பாரி போராட்டத்தால், அப்பகுதியில் சிறிது நேரம் சலசலப்பு ஏற்பட்டது.