ஈரோடு:விஜயமங்கலம், கள்ளியம்புதுார் கிராம மக்கள், ஈரோடு கலெக்டர் அலுவலகத்தில், மனு வழங்கி கூறியதாவது: கள்ளியம்புதுாரில் டாஸ்மாக் கடை (எண்: 3935) இயங்கி வருகிறது. கடையை மூட வேண்டும். இதுகுறித்து முதல்வரின் முகவரிக்கு மின்னஞ்சல் அனுப்பியும் நடவடிக்கை இல்லை.
கடைக்கு அதிக எண்ணிக்கையில் மது குடிப்போர் வந்து செல்வதால், போக்குவரத்து இடையூறாகிறது. அடிக்கடி விபத்து, சண்டை நடக்கிறது. கடை பகுதியில் அங்கன்வாடி, மாரியம்மன் கோவில், பஸ் நிறுத்தம், ரேஷன் கடை இயங்குகிறது. இங்கு செல்வோர் பாதிக்கின்றனர். எனவே இக்கடையை அகற்ற வேண்டும். இவ்வாறு கூறினர்.

கவுந்தப்பாடியில் ஆர்ப்பாட்டம்கவுந்தப்பாடி பைபாஸ் சாலையில், அருள்தரும் நீள்நெடுங்கண்ணி அம்மை உடனமர், அண்டம் முழுதுடையார் கோவில் உள்ளது. இதன் அருகே டாஸ்மாக் கடை (எண்: 3809) இயங்குகிறது. கடைக்கு வரும் குடிமகன்களால், கோவிலுக்கு வரும் பக்தர்களுக்கு இடையூறாக உள்ளது. எனவே கடையை அகற்றக்கோரி, கோவில் வளாகத்துக்குள் நுாற்றுக்கும் மேற்பட்ட பக்தர்கள் நேற்று காலை குவிந்தனர்.


பின் கோவில் முக்கியஸ்தர்களுடன் மக்கள் ஒன்று சேர்ந்து, டாஸ்மாக் கடையை அகற்றக்கோரி ஊர்வலமாக சென்று, கடை முன் நின்று, ஆர்ப்பாட்டத்தில் ஈடுபட்டனர். பவானி தாசில்தார் வெங்கடேஸ்வரன் மற்றும் கவுந்தப்பாடி போலீசார், பேச்சுவார்த்தையில் ஈடுபட்டனர். கடையை அகற்ற நடவடிக்கை எடுக்கப்படும் என உறுதியளிக்கவே கலைந்து சென்றனர்.