சென்னை: நடிகர் ரஜினியின் மனைவி லதா, 'மக்கள் மேடை - மக்கள் இயக்கம்' என்ற அமைப்பை திடீரென தொடங்கி உள்ளார்.

நடிகர் ரஜினி அரசியலுக்கு வருவதாக அறிவித்து, கொரோனாவை காரணம் காட்டி பின்வாங்கினார். இந்நிலையில், அவரது மனைவி லதா, புதிய மக்கள் இயக்கம் ஒன்றை தொடங்கி உள்ளார்.

இதுகுறித்து, அவர் கூறி உள்ளதாவது: மக்கள் மேடை - மக்கள் இயக்கத்துடன் இணைந்து, தமிழகத்துக்காக பணியாற்ற நினைப்பவர்கள், எங்களுடன் ஒன்றாக சேரலாம். பெரிய மக்கள் சேவையாக, மக்கள் சக்தியாக உருவாகி, இந்த மாநிலத்துக்கு பல நன்மைகளை சேர்க்க வாருங்கள். ஒன்றாக சேருவோம்; ஆக்கப்பூர்வமான காரியங்களை செய்வோம். சாமானிய மக்கள் யாராக இருந்தாலும், நல்ல திட்டங்கள், நல்ல எண்ணம், மனம் கொண்டவர்கள் யாராக இருந்தாலும், தமிழகத்துக்கு நல்லது செய்ய வேண்டும் என நினைப்பவர்கள், எங்களை தொடர்பு கொள்ளலாம்.

மேலும், ஐ.ஏ.எஸ்., அதிகாரிகள், ஐ.பி.எஸ்., அதிகாரிகள், அரசு அதிகாரிகள், ஆசிரியர்கள் உட்பட பல்வேறு அறிஞர்கள், தங்களின் அனுபவங்களை எங்களுக்கு வழங்கலாம். எங்களை தொடர்பு கொண்டு, தமிழகத்துக்காகவும், தொகுதிக்காகவும் நீங்கள் பணியாற்றலாம்.

நாங்கள், மாநிலத்துக்காக பணியாற்றும் உள்ளூர் தலைவர்களை உருவாக்க நினைக்கிறோம். இங்கு பல்வேறு வளங்கள், யோசனைகள், பலம் உள்ளன. அவற்றை மாநிலத்துக்கு வழங்குவதற்காக மக்கள் தயாராக உள்ளனர். அனைத்து தரப்பு மக்களும் எங்களுடன் வாருங்கள். இவ்வாறு அவர் கூறியுள்ளார்.