பாலக்காடு: பாலக்காடு நகரில் திருடப்பட்ட மினிலாரி, கோவையில் கைவிடப்பட்ட நிலையில் மீட்கப்பட்டது.

கேரள மாநிலம், பாலக்காடு மேற்கு யாக்கரை, விஸ்வேஸ்வரா நகரை சேர்ந்தவர் கிருஷ்ணன்குட்டி. இவர் தனது வாகனத்தை சாலையோரமாக நிறுத்திவிட்டு, கடைக்கு சென்றார். அப்போது, மர்மநபர்கள் மினிலாரியை திருடி சென்றனர்.

லாரி மாயமானதால் அதிர்ச்சி அடைந்தவர், பாலக்காடு டவுன் தெற்கு போலீசாருக்கு தகவல் தெரிவித்தார். இதையடுத்து, மாவட்டம் முழுவதும் வாகன சோதனை துவங்கியது. வாகனத்தில் இருந்த ஜி.பி.எஸ். தொழில்நுட்பத்தின் உதவியோடு போலீசார் தேடுதலில் ஈடுபட்டனர்.

அப்போது, வாகனம் வாளையார் எல்லையை கடந்து கோவை பகுதிக்குள் நுழைந்து, ஒரே இடத்தில் நிறுத்தப்பட்டிருப்பது தெரிந்தது. கோவை பகுதிக்கு சென்ற போலீசார், அங்கு கேட்பாரற்று நிறுத்தப்பட்டிருந்த வாகனத்தை மீட்டு, தொடர் விசாரணை மேற்கொண்டுள்ளனர்.