புதுடில்லி: ராஜ்யசபா தேர்தலுக்கான வேட்புமனு நிராகரிக்கப்பட்டதை எதிர்த்து காங்கிரஸ் தலைவர் மீனாட்சி நடராஜன் தாக்கல் செய்த மனுவை இன்று (ஜூன் 12) சுப்ரீம் கோர்ட் விசாரணை நடத்த உள்ளது.

தமிழகம், கர்நாடகா, ம.பி., உட்பட நாடு முழுதும் காலியாக உள்ள, 26 ராஜ்யசபா இடங்களுக்கு, வரும் 18ல் தேர்தல் நடக்கிறது. முதல்வர் மோகன் யாதவ் தலைமையில் பா.ஜ., ஆட்சி நடக்கும் ம.பி.,யில், மூன்று ராஜ்யசபா இடங்களுக்கு தேர்தல் நடக்கிறது.


மத்திய பிரதேசத்தில் முன்னாள் எம்.பி., மீனாட்சி நடராஜனை அக்கட்சி வேட்பாளராக காங்கிரஸ் களமிறக்கியது. காங்., வேட்பாளர் மீனாட்சி நடராஜனின் வேட்புமனுவை தேர்தல் நடத்தும் அதிகாரி நிராகரித்தார். தெலுங்கானாவில், நீதிமன்றத்தில் நிலுவையில் உள்ள வழக்கை அவர் மறைத்ததாக, பா.ஜ., வேட்பாளர் மகேஷ் கெவத் அளித்த புகாரின்படி, இந்த நடவடிக்கை எடுக்கப்பட்டது.

இது தொடர்பாக, டில்லியில், தேர்தல் கமிஷன் அதிகாரிகளை அக்கட்சியின் மூத்த தலைவர்கள் சந்தித்து பேசினர். இந்த நடவடிக்கை ஜனநாயகத்திற்கு எதிரானது என்றும், முடிவை மறுபரிசீலனை செய்ய வேண்டும் என்றும் அவர்கள் வலியுறுத்தினர்.

இந்நிலையில் ராஜ்யசபா தேர்தலுக்கான வேட்புமனு நிராகரிக்கப்பட்டதை எதிர்த்து காங்கிரஸ் தலைவர் மீனாட்சி நடராஜன் சுப்ரீம் கோர்ட்டில் மனு தாக்கல் செய்தார். இந்த வழக்கு மீதான விசாரணை இன்று (ஜூன் 12) நடைபெற உள்ளது.

இருப்பினும், நீதிபதிகள் பிரஷாந்த் குமார் மிஸ்ரா மற்றும் அதுல் எஸ் சந்தூர்கர் ஆகியோர் அடங்கிய விடுமுறைக்கால அமர்வு, நடைபெற்று வரும் தேர்தல் நடவடிக்கைகளுக்கு மத்தியில் இந்த மனு எவ்வாறு ஏற்கத்தக்கது என கேள்வி எழுப்பி உள்ளதாக வட்டாரங்கள் தெரிவிக்கின்றன.