சென்னை: தேசிய, 'கிக் பாக்சிங்' போட்டியில், 26 தங்க பதக்கங்களுடன் 78 பதக்கங்கள் வென்ற தமிழக அணி, ஒட்டுமொத்த அளவில் மூன்றாம் இடத்தை கைப்பற்றியது.

'வாக்கோ இந்தியா கிக் பாக்சிங்' அமைப்பு சார்பில், தேசிய சப் - ஜூனியர் கிக் பாக்சிங் போட்டி, மத்திய பிரதேசம் மாநிலத்தில் நடந்தது.

போட்டியில் தமிழகம், மஹாராஷ்டிரா, ஹரியானா, ஆந்திரா, அசாம் உள்ளிட்ட 23 மாநிலங்களைச் சேர்ந்த ஆயிரக்கணக்கான வீரர் - வீராங்கனையர் பங்கேற்று திறமைகளை வெளிப்படுத்தினர்.

'பாயின்ட் பைட், கிக் லைட்' உள்ளிட்ட பல்வேறு சண்டை பிரிவுகளில் கடும் போட்டிகளுக்கு மத்தியில், தமிழக அணி, 26 தங்கம், 22 வெள்ளி, 30 வெண்கலம் என, மொத்தம் 78 பதக்கங்களை கைப்பற்றி, ஒட்டுமொத்த அளவில் மூன்றாவது இடத்தை பிடித்தது.

பதக்க பட்டியலில், 44 தங்கம், 35 வெள்ளி, 60 வெண்கலம் என மொத்தம், 139 பதக்கங்களுடன் மஹாராஷ்டிரா அணி முதலிடத்தை தட்டிச்சென்றது. ஹரியானா அணி, 32 தங்கம், 34 வெள்ளி, 28 வெண்கலம் என, 94 பதக்கங்களுடன் இரண்டாவது இடத்தை பிடித்தது.