சென்னை: அரண்மனைக்காரன் தெரு உள்ளிட்ட பகுதிகளில் போக்குவரத்து நெரிசலை குறைக்க, போக்குவரத்து போலீசாரும், மாநகராட்சியும் உடனடி நடவடிக்கை எடுக்க வேண்டும் என, உயர் நீதிமன்றம் உத்தரவிட்டுள்ளது.

சென்னை உயர் நீதிமன்றத்தில் வழக்கறிஞர் எஸ்.நடராஜன் தாக்கல் செய்த மனு:

உயர் நீதிமன்றத்துக்கு எதிரே உள்ள அரண்மனைக்காரன் தெருவில் சர்ச், பள்ளிகள், உணவகங்கள், தனியார் அலுவலகங்கள் உள்ளதால் கடும் போக்குவரத்து நெரிசல் ஏற்படுவதுடன், அவசர நேரங்களில் ஆம்புலன்ஸ்கூட செல்ல முடிவதில்லை.

இதுகுறித்து, போலீஸ் கமிஷனர், பூக்கடை இன்ஸ்பெக்டர் உள்ளிட்டோருக்கு மனு அளித்து ஓராண்டாகியும் இதுவரை நடவடிக்கை இல்லை.

இவ்வாறு அதில் கூறப்பட்டுள்ளது.

மனுவை விசாரித்த தலைமை நீதிபதி எஸ்.ஏ.தர்மாதிகாரி, நீதிபதி ஜி.அருள்முருகன் அமர்வு பிறப்பித்த உத்தரவு:

போக்குவரத்து தொடர்பான பிரச்னையை சரிசெய்வதில் அதிகாரிகளே சிறந்த நீதிபதிகள். எனவே, இந்த விவகாரத்தில், 2019ல் பிறப்பிக்கப்பட்ட உத்தரவை, இதுவரை நிறைவேற்றாவிட்டால் உடனே நிறைவேற்ற வேண்டும்.

அரண்மனைக்காரன் தெரு உள்ளிட்ட பகுதிகளில் போக்குவரத்து நெரிசல் இல்லாத நிலையை அதிகாரிகள் உறுதி செய்ய வேண்டும்.

இவ்வாறு உத்தரவில் கூறப்பட்டுள்ளது.