அரியாங்குப்பம்: ரியல் எஸ்டேட் தொழில் அதிபரிடம் 98 லட்சம் ரூபாய் மோசடி செய்த தம்பதியை போலீசார் தேடிவருகின்றனர்.

அரியாங்குப்பம் காந்திஜி நகரை சேர்ந்தவர் தமிழ்மலர்செல்வன், 52; ரியல் எஸ்டேட் ஏஜென்சி நடத்தி வருகிறார். வானுார் அடுத்த கடப்பேரிக்குப்பத்தை சேர்ந்தவர் செந்தமிழ் இவரது மனைவி பிரேமா இருவரும் சேர்ந்து தொழில் செய்வதற்காக, தமிழ்மலர்செல்வனிடம் கடந்த 2021 முதல் 2024ம் ஆண்டு வரை ரொக்கமாகவும், மற்றும் வங்கி மூலமாக 3 கோடி ரூபாய் கடனாக வங்கியிருந்தனர்.

அதற்காக தமிழ்மலர் செல்வன் மற்றும் அவரது சகோதரர் விக்னேஷ் பேரில் இரண்டு இடத்திற்கு செந்தமிழ் பவர் கொடுத்திருந்தார்.

இந்நிலையில், கொடுத்த பணத்தில் இருந்து பல்வேறு தவணைகள் மூலம் தமிழ்மலர்செல்வன் குறிப்பிட்ட தொகையை பெற்றுள்ளார். மேலும், தர வேண்டிய 98 லட்சம் ரூபாய் பாக்கி பணத்தை தராமல் தம்பதியினர் காலம் கடத்தி வந்தனர். இதற்கிடையில் அவர் கொடுத்திருந்த பவர் பத்திரத்தை ரத்து செய்ததுடன் பணத்தை தராமல் ஏமாற்றி வந்தார்.

கடந்த 13ம் தேதி பணத்தை கேட்க செந்தமிழ் வீட்டுக்கு சென்ற தமிழ்மலர்செல்வனை அவர் கொலை மிரட்டல் விடுத்தனர். இது குறித்து, தமிழ்மலர்செல்வன் கொடுத்த புகாரின் பேரில், அரியாங்குப்பம் போலீசார் செந்தமிழ் அவரது மனைவி பிரேமா மீது மோசடி வழக்கு பதிந்து தேடிவருகின்றனர்.