கோவை: கேரளத்தில் இருந்து பரவிய தக்காளி காய்ச்சல், தற்போது கோவையை சுற்றியுள்ள குழந்தைகளுக்கு பாதிப்பை ஏற்படுத்துகிறது.

உள்ளங்கை, கால், வாய் பகுதியில், சிவப்பு நிற கொப்புளங்கள் ஏற்படுத்தி, அரிப்பு, காய்ச்சல் உள்ளிட்ட அறிகுறிகளை உண்டாக்குகிறது.

 பாதிக்கப்பட்ட குழந்தையுடன் நெருங்கிப் பழகுவது, தண்ணீர் பாட்டில், உணவுப் பொருட்களைப் பகிர்ந்து கொள்வது போன்றவற்றின் மூலம், இத்தொற்று பரவும்.

தினசரி இருமுறை குளிப்பது, உடலைச் சுத்தமாக வைத்திருப்பது அவசியம். வாயில் புண்கள் இருந்தால், காரமில்லாத திரவ உணவு, போதிய அளவு தண்ணீர் குடிப்பதை உறுதி செய்வது அவசியம் என, டாக்டர்கள் தெரிவித்தனர்.

அரசு மருத்துவமனை குழந்தைகள் நல பிரிவு டாக்டர் செந்தில்குமார் கூறுகையில்,‘‘  காக்சாக்கி ஏ 16 என்ற வைரஸ் மூலம் இது பரவுகிறது. காட்சிக்கு சின்னம்மை போலவே இருக்கும்.  சின்னம்மையில் அதிக காய்ச்சல் தொடர்ந்து இருக்கும். ஆனால் இதில், தடிப்புகளே முக்கிய அறிகுறி. அதிக காய்ச்சல் இருக்காது. இருப்பினும்,  குழந்தைகள் நல மருத்துவரிடம் பரிசோதிப்பது அவசியம். விரைவில் குணப்படுத்தலாம் என்பதால், தேவையில்லாத பயம் வேண்டாம் ,’’ என்றார்.