ஆரணி: ஆரணி அருகே, தாயின் கண் முன்னே, அவரது மகளிடம் சில்மிஷத்தில் ஈடுபட்ட அபினேஷ், 22, என்பவரை, போலீசார் கைது செய்தனர்.

திருவண்ணாமலை மாவட்டம், சேத்துப்பட்டு பகுதியைச் சேர்ந்த, 42 வயது பெண்ணும், அவரது, 19 வயது மகளும், நேற்று முன்தினம் இரவு, ஆரணியிலுள்ள தியேட்டரில், சினிமா பார்த்து விட்டு இரவு, 10:00 மணிக்கு டூ - வீலரில் வீடு திரும்பி கொண்டிருந்தனர்.

ஆரணியைச் சேர்ந்தவர் அபினேஷ், 22. இவர், ஆகாரம் கூட்ரோடு அருகே, அப்பெண்ணின் மொபட்டை மடக்கி தகராறில் ஈடுபட்டு, கன்னத்தில் 'பளார்' என அறைந்தார். பின் அவரின், 19 வயது மகளிடம் சில்மிஷத்தில் ஈடுபட்டார். அக்கம் பக்கத்தினர், அபினேஷை சரமாரியாக தாக்கி, ஆரணி போலீசில் ஒப்படைத்தனர்.

விசாரணையில், அபினேஷ், கஞ்சா போதையில் இருந்ததும், அவர், ஆரணியில் பைக்கை எரித்த வழக்கில் கைதாகி, தற்போது ஜாமினில் வந்துள்ளதும் தெரிந்தது. போலீசார் அவரை கைது செய்தனர்.