ஸ்ரீபெரும்புதுார், ஆக. 6–

வளத்தாஞ்சேரியில், மண் அரிப்பால் சேதமடைந்துள்ள சாலை வளைவில் ஏற்பட்ட பள்ளத்தால், வாகன ஓட்டிகள் விபத்தில் சிக்கி வருகின்றனர்.

ஸ்ரீபெரும்புதுார் – சிங்கபெருமாள் கோவில் சாலையில், போந்துார் அடுத்த தெரேசாபுரத்தில் இருந்து, வளத்தாஞ்சேரி செல்லும் சாலை வழியே தினமும் ஏராளமான வாகனங்கள் சென்று வருகின்றன.

இந்த சாலையில், வளத்தாஞ்சேரி அருகே உள்ள வளைவில் மண் அரிப்பு ஏற்பட்டு சாலை சரிந்து சேதமடைந்து உள்ளது.

இதனால், இவ்வழியாக செல்லும் வாகன ஓட்டிகள், எதிரே வரும் வாகனத்திற்கு வழிவிட ஒதுங்கும் போது விபத்தில் சிக்கி வருகின்றனர். இரவு நேரங்களில் செல்லும் வாகன ஓட்டிகள் வளைவில் திரும்பும் போது, சேதமான சாலையால் தடுமாற்றம் அடைந்து தொடர் விபத்தில் சிக்கி வருகின்றனர்.

எனவே, மண் அரிப்பால் சேதமான சாலையை சீரமைக்க, நெடுஞ்சாலைத் துறை அதிகாரிகள் நடவடிக்கை எடுக்க வேண்டும் என, வாகன ஓட்டிகள் வலியுறுத்தி வருகின்றனர்.