கள்ளக்குறிச்சி: கள்ளக்குறிச்சி காவல் உட்கோட்டத்தில் சுதந்திர தினத்தன்று மதுபாட்டில் விற்ற 2 பேரை போலீசார் கைது செய்தனர்.

வரஞ்சரம் சிறப்பு சப் இன்ஸ்பெக்டர் காதர்ஷெரீப் மற்றும் போலீசார் நேற்று முன்தினம் ரோந்துப் பணியில் ஈடுபட்டனர். அப்போது போலீசை பார்த்ததும், புதுச்சேரி மாநில மது பாட்டில் விற்ற கூத்தக்குடி சந்தைத்தோப்பு பாலமுருகன், 46; தப்பியோடினார். போலீசார் அங்கிருந்த 18 மதுபாட்டில்களை பறிமுதல் செய்து, வழக்கு பதிந்து பாலமுருகனை தேடி வருகின்றனர்.

இதேபோன்று, கீழ்குப்பம் சப் இன்ஸ்பெக்டர் தேவமூர்த்தி தலைமையிலான போலீசார் ரோந்து பணியின் போது மதுபாட்டில் விற்ற ராமமூர்த்தி, 37; என்பவரை கைது செய்து, 4 மதுபாட்டில்களை பறிமுதல் செய்தனர்.

மேலும், கச்சிராயபாளையம் சப் இன்ஸ்பெக்டர் மணிகண்டன் ரோந்து பணியின் போது, கா.அலம்பலம் பகுதியில் மதுபாட்டில் விற்ற மகேஷ், 35; ஆறுமுகம் மனைவி விஜயா,43; ஆகிய இருவர் மீதும் வழக்குப் பதிந்து, 9 மதுபாட்டில்களை பறிமுதல் செய்தனர்.

தியாகதுருகம் சப் இன்ஸ்பெக்டர் ஜெகதீசன் ரோந்து பணியின் போது, பழைய பல்லகச்சேரியில் மதுபாட்டில் விற்ற ஏழுமலை, 46; என்பவரை கைது செய்து, 7 மதுபாட்டில்களை பறிமுதல் செய்தனர்.

மொத்தமாக, 5 பேர் மீது வழக்கு பதிந்து, அதில் 2 கைது செய்ததுடன், 38 மதுபாட்டில்களை பறிமுதல் செய்தனர்.