-நமது நிருபர்-

கடற்படைக்காக இரண்டு சீ கார்டியன் ரக ட்ரோன்களை இந்தியா 30 மாதங்களுக்கு குத்தகைக்கு எடுக்கிறது. இதற்காக ரூ.1943 கோடியில் ஒப்பந்தம் கையெழுத்தாகி உள்ளது.

இந்தியப் பெருங்கடல் பகுதியில் தொடர்ச்சியான உளவு பார்த்தல் மற்றும் கண்காணிப்புப் பணிகளை தீவிரப்படுத்தவும், நவீன சென்சார்கள் மற்றும் பல திறன் கொண்ட கருவிகள் மூலம் கடல் எல்லைப் பாதுகாப்பை மேம்படுத்தவும் இந்திய கடற்படை திட்டமிட்டுள்ளது.

இதற்காக மத்திய பாதுகாப்புத்துறை அமைச்சகம் இந்திய கடற்படைக்காக இரண்டு சீ கார்டியன் ரக ட்ரோன்களை 30 மாத காலத்திற்கு குத்தகைக்கு எடுப்பதற்காக அமெரிக்காவை சேர்ந்த ஜெனரல் அட்டாமிக்ஸ் ஏரோநாட்டிகல் சிஸ்டம்ஸ் நிறுவனத்துடன் ரூ.1943 கோடியில் ஒப்பந்தத்தில் கையெழுத்திட்டது.

நீண்ட நேரம் பறக்கும் திறன் கொண்ட இந்த ட்ரோன்கள் இந்தியக் கடற்படையின் கடல்சார் கண்காணிப்பை மேம்படுத்தும் என பாதுகாப்புத்துறை அமைச்சகம் தெரிவித்துள்ளது.

சிறப்பு என்ன?

* MQ-9B Sea Guardian ட்ரோன்கள், நீண்ட நேரம் வானில் பறந்து உளவு பார்த்தல் மற்றும் துல்லியமாகத் தாக்கும் பணிகளுக்காக வடிவமைக்கப்பட்டுள்ளது. 30 மணி நேரத்திற்கும் மேலாக வானில் பறக்கக்கூடியது, 40,000 அடிக்கும் அதிகமான உயரத்தில் இயங்கக்கூடியது; பரந்த கடல் மற்றும் நிலப்பரப்புகளைக் கண்காணிக்கக்கூடியது.

* 450 கிலோ எடையுள்ள குண்டுகளையும் சுமந்து செல்லும் திறன் கொண்டவை.

* தரைப்பகுதியைத் தாக்குதல் மற்றும் உளவு பார்த்தல் பணிகளுக்காகவே பிரத்யேகமாக வடிவமைக்கப்பட்டது. இந்த ட்ரோன்களை குத்தகைக்கு எடுப்பது கடற்படைக்குக் கூடுதல் உயர்தரக் கண்காணிப்புத் திறனை வழங்குகிறது.

* தொடர்ச்சியான கண்காணிப்பு, பரந்த கடல்சார் பகுதிகளில் நடைபெறும் நடவடிக்கைகளைக் கண்காணிக்கவும் கடற்படைக்கு உதவும்.

ஏற்கனவே சில ஆண்டுகளுக்கு முன்பு குத்தகைக்கு எடுக்கப்பட்ட இரண்டு சீ கார்டியன் ட்ரோன்களை கடற்படை இயக்கி வருகிறது.