நாகர்கோவில்: கன்னியாகுமரி மாவட்டம், ராஜாக்கமங்கலம் அருகே, காக்கா தோப்பு பகுதியைச் சேர்ந்தவர் நாகரத்தினம், 32. இவரது மனைவி அஜித்ரா, 28. கருத்து வேறுபாட்டால் இருவரும் பிரிந்து வாழ்ந்தனர். குடும்ப நல நீதிமன்றத்தில் வழக்கும் நிலுவையில் உள்ளது.

இந்நிலையில், இருவரும் பேசி, மீண்டும் சேர்ந்து வாழ முடிவெடுத்தனர். அப்போது, தம்பதியின் பெண் குழந்தையை மீண்டும் அவர்களிடமே வழங்க அஜித்ராவின் தாய் பிரசன்ன குமாரி மறுத்தார். நாகரத்தினம், அஜித்ராவை கடத்திவிட்டதாக போலீசில் அவரது தாய் புகாரளித்தார். விசாரணைக்கு ஆஜரான அஜித்ரா, தன்னை யாரும் கடத்தவில்லை என்றும், கணவருடன் தான் சென்றதாகவும் கூறினார். தொடர்ந்து, தங்கள் குழந்தையை மீட்டுத்தருமாறு போலீசாரிடம் தம்பதி புகாரளித்தனர். கலெக்டர் அலுவலகத்திலும் அவர்கள் மனு அளித்த நிலையில், போலீஸ் விசாரணைக்கு உத்தரவிடப்பட்டுள்ளது.