போச்சம்பள்ளி; முன்னாள் ராணுவ வீரர் வீட்டில், பூத்து குலுங்கிய பிரம்ம கமலம் பூக்களை மக்கள் ஆர்வத்துடன் பார்த்து சென்றனர்.
போச்சம்பள்ளியை சேர்ந்த முன்னாள் ராணுவ வீரர் மகேஸ்வரன், 50. இவர் தன் வீட்டில், மூன்று பிரம்மகமலம் செடிகளை வளர்த்து வருகிறார். இந்நிலையில், நேற்று முன்தினம் இரு செடிகளில், 37 பிரம்மகமலம் பூக்கள் பூத்து குலுங்கின. ஆண்டுக்கு ஒரு முறை பூக்கும் பிரம்ம கமலம், நள்ளிரவில் பூத்து, ஓரிரு நாட்களில் உதிர்ந்து போகும் தன்மை

கொண்டது.

ஜூலை முதல் அக்., வரை இரவில் பூக்கும் வித்தியாசமான மலர், இமயமலையில் உள்ள பூக்கள் வகையை சேர்ந்தது. மருத்துவ குணமும், தெய்வீக தன்மையும் வாய்ந்த அதிசய மலரை, அது மலரும் நேரத்தில் கண்டு தரிசித்தால், நல்ல பலன்கள் கிடைக்கும் என நம்பப்படுகிறது.
இந்நிலையில், மகேஸ்வரன் வீட்டிலிருந்த செடிகளில் பூத்து குலுங்கிய பிரம்ம கமல பூக்கள் முன், பெண்கள் கோலமிட்டு விளக்கேற்றி வழிபட்டனர். பிரம்ம கமலம் பூக்கள் பூத்துள்ளதை அப்பகுதி மக்கள், குழந்தைகள் ஆர்வமுடன் பார்த்து
சென்றனர்.