சென்னை: சிறுமியரை பாலியல் வன்முறை செய்ததாக, ஏற்கனவே கைது செய்யப்பட்டு, சென்னை புழல் சிறையில் அடைக்கப்பட்டுள்ள, 'கிரானைட்' வீரமணி மீது, மேலும் ஒரு, 'போக்சோ' வழக்கு பதிவு செய்யப்பட்டுள்ளது.

கல்வி கற்க உதவுவது, தீபாவளி பரிசு பொருட்கள் வழங்குவது போல, சிறுமியரை பாலியல் வன்முறை செய்ததாக, 'கிரானைட்' வீரமணி, 85 ஏற்கனவே கைது செய்யப்பட்டு, சென்னை புழல் சிறையில் அடைக்கப்பட்டு உள்ளார். குற்றத்திற்கு உடந்தையாக இருந்த, வீரமணியின் தோழி சாந்தி, 60, அவரது கணவர், மகேந்திர சிம்ஹன்,63 உட்பட, ஆறு பேரும் கைதாகியுள்ளனர்.

வீரமணி மீதான குற்றம் தொடர்பாக, ஏற்கனவே, போக்சோ சட்டத்தின் கீழ் ஐந்து வழக்குகள் பதிவு செய்யப்பட்டுள்ளன. இந்நிலையில், அவர் மீது ஆறாவதாக மேலும் ஒரு போக்சோ வழக்கு பதிவு செய்யப்பட்டுள்ளது. இதுவரை அவர், இரண்டு வழக்குகளில் கைது செய்யப்பட்டுள்ளார். அடுத்தடுத்து மற்ற வழக்குகளிலும், அவரை கைது செய்ய இருப்பதாக போலீசார் தெரிவித்தனர்.

சென்னை ராயப்பேட்டை லாயிட்ஸ் சாலையில், வீரமணியின் சொகுசு பங்களா உள்ளது. அங்கு ஏற்கனவே, சென்னை மத்திய குற்றப்பிரிவு போலீசார் சோதனை நடத்தி, குற்றம் தொடர்பான ஆவணங்களை பறிமுதல் செய்துள்ளனர். இந்நிலையில், மதுரை மாவட்ட போலீசாருடன் இணைந்து, மத்திய குற்றப்பிரிவு போலீசார், நேற்றும் வீரமணி வீட்டில் சோதனை நடத்தினர்.