புதுடில்லி: டில்லி சீக்கிய குருத்வாரா நிர்வாக கமிட்டி தலைவர் ஹர்மீத் சிங் கல்கா, டில்லி போலீஸில் புகார் ஒன்றை அளித்தார்.

அதில், குருத்வாராவில் ஆம் ஆத்மி கட்சியினர் குழப்பத்தில் ஈடுபட்டனர். தவறாக வழிநடத்தும் வகையில் வீடியோ மற்றும் புகைப்படங்களை சமூக ஊடகங்களில் பதிவிடுகின்றனர் எனக்குறிப்பிட்டு இருந்தார். அது குறித்த வீடியோ மற்றும் புகைப்படங்களை பகிர்ந்தார்.

இதனையடுத்து அக்கட்சி தலைவர் கெஜ்ரிவால், எம்எல்ஏக்கள் மற்றும் தலைவர்கள் மீது போலீசார் வழக்குப்பதிவு செய்தனர்.

ஹர்மீத் சிங் கல்கா நிருபர்களிடம் கூறுகையில், குருத்வாரா அருகே ஆம்ஆத்மியினர் போராட்டத்தில் ஈடுபட்டனர். சீக்கிய சமூகத்தினர் இடையே அதிருப்தி நிலவுகிறது. கெஜ்ரிவால் மீது போலீசில் புகார் அளித்தேன்.

அக்கட்சி தொண்டர்கள் சிலர், குருத்வாராவுக்குள் நுழைந்து பதாகைகளையும், போஸ்டர்களை காட்டி கோஷங்களை எழுப்பினர். அவர்களின் செயல் மதத்தின் புனிதத்திற்கு எதிரானவை. குருத்வாராவிற்குள் நுழைவதை தவிர்க்க வேண்டும் என போலீசிடமும் கோரிக்கை வைத்துள்ளேன். இவ்வாறு அவர் கூறினார்.