வானம் பொய்த்து, பூமி வெடித்துக் கிடக்கும் கொடுமையான காட்சிகளை நாம் பலமுறை பார்த்திருப்போம். ஆனால், அதற்கெல்லாம் பின்னால் இருக்கும் அறிவியல் காரணமும், மனிதகுலம் எதிர்கொள்ளும் பேராபத்தும் எவ்வளவு தீவிரமானது என்பதைச் சிந்திப்பது அவசியமாகும். இதற்கு இலங்கையின் பொலன்னறுவை மாவட்டத்தில் அமைந்துள்ள பாரம்பரிய விவசாயப் பகுதியான மேதவாச்சியா ஒரு சிறந்த உதாரணம்.பசிபிக் பெருங்கடலில் ஏற்படும் தட்பவெப்ப மாற்றமான 'எல் நினோ' நிகழ்வு, உலகளாவிய வானிலை அமைப்பைத் தலைகீழாக மாற்றிவிடும் வல்லமை கொண்டது. இதன் தாக்கத்தால், உலகின் பல பகுதிகளில் கடுமையான வறட்சியும், சில பகுதிகளில் பேரழிவை ஏற்படுத்தும் வெள்ளமும் ஏற்படுகிறது. இலங்கையைப் பொறுத்தவரை, எல் நினோ தாக்கத்தால் நாட்டின் 'உலர் வலயம்' கடுமையாகப் பாதிக்கப்பட்டுள்ளது. வழக்கமாகப் பெய்ய வேண்டிய பருவமழை பொய்த்துப் போய், வெயில் வாட்டி வதைக்கத் தொடங்குவதால் நிலம் காய்ந்து வறண்டு விட்டது.மேதவாச்சியா போன்ற பகுதிகள் இயற்கையாகவே மழைநீரையும், அங்குள்ள வரலாற்றுச் சிறப்புமிக்க ஏரிப் பாசனங்களையும் நம்பி வாழும் கிராமங்கள் ஆகும். ஆனால், பல தசாப்தங்களில் இல்லாத அளவுக்கு இந்த முறை தீவிரமடைந்துள்ள வறட்சியால், அங்கே உள்ள குளங்களும் கிணறுகளும் முற்றிலும் வறண்டுவிட்டன. நிலத்தடி நீர்மட்டம் பூமிக்கு அடியில் மிகக் கீழே சென்றுவிட்டதால், குடிநீருக்குக் கூட வழியில்லாமல் மக்கள் தவிக்கும் நிலை ஏற்பட்டுள்ளது.
அவசர காலக்கட்டங்களில் அரசாங்கம் மற்றும் உள்ளூராட்சி மன்றங்கள் லாரிகள் மூலம் குடிநீரை வழங்கி, தற்காலிகத் தொட்டிகளை அமைத்து உதவினாலும், மில்லியன் கணக்கான மக்களின் தாகத்தைத் தீர்ப்பது என்பது நிர்வாகத்திற்கு மிகப் பெரிய சவாலாகவே உள்ளது. இது சின்ன ஊர்களின் பிரச்சினையாக மட்டும் பார்க்கப்படாமல், ஒட்டுமொத்தப் பருவநிலை மாற்றத்தின் எச்சரிக்கையாகப் பார்க்கப்பட வேண்டும்.மேதவாச்சியாவின் இந்தத் துயரம் நமக்கெல்லாம் ஒரு பாடம். பருவநிலை மாற்றமும் எல் நினோ போன்ற இயற்கைச் சீற்றங்களும் இனி வரும் காலங்களில் இன்னும் தீவிரமடையவே வாய்ப்புள்ளது.மழைநீரைச் சேகரிப்பதும் , நிலத்தடி நீரைப் பாதுகாப்பதும் காலத்தின் கட்டாயம். காடழிப்பு மற்றும் அதிகப்படியான மாசுபடுத்துதலைக் கட்டுப்படுத்தாவிட்டால், மேதவாச்சியாவின் நிலை நாளை நமது ஊருக்கும் வரலாம்.
இயற்கை கோபம் கொண்டால் மனிதனின் அனைத்து வசதிகளும் முடங்கிவிடும் என்பதற்கு இந்த இலங்கையின் வறட்சியே சாட்சி. விழித்துக்கொள்வோம், இயற்கையைப் பாதுகாப்போம்!
-எல்.முருகராஜ்.