திருவனந்தபுரம்: கேரள உயர் நீதிமன்ற உத்தரவுப்படி, 'சி.எம்.ஆர்.எல்., - எக்ஸாலாஜிக்' நிறுவனம் தொடர்புடைய லஞ்ச வழக்கில், மார்க்.கம்யூ., கட்சியைச் சேர்ந்த அம்மாநில முன்னாள் முதல்வரும், சட்டசபை எதிர்க்கட்சித் தலைவருமான பினராயி விஜயன், 81, அவரது மகள் வீணா உள்ளிட்டோர் மீது, லஞ்ச ஒழிப்பு போலீசார் நேற்று வழக்கு பதிவு செய்தனர்.

கேரளாவில், காங்கிரசைச் சேர்ந்த முதல்வர் சதீசன் தலைமையில் ஐக்கிய ஜனநாயக முன்னணி கூட்டணி ஆட்சி நடக்கிறது. இங்கு, 2016 -- 26 வரை மார்க்சிஸ்ட் மூத்த தலைவர் பினராயி விஜயன் முதல்வராக பதவி வகித்தார். அப்போது, 2017ல், அவரது மகள் வீணாவுக்கு சொந்தமான, தற்போது செயல்பாட்டில் இல்லாத, 'எக்ஸாலாஜிக் சொல்யூஷன்ஸ்' என்ற ஐ.டி., நிறுவனத்துக்கு, எந்தவொரு தகவல் தொழில்நுட்ப சேவையும் பெறாமல், 2.78 கோடி ரூபாயை, சி.எம்.ஆர்.எல்., எனப்படும், 'கொச்சின் மினரல்ஸ் அண்டு ரூட்டைல் லிமிடெட்' நிறுவனம் வழங்கியதாக கூறப்படுகிறது.

இந்த விவகாரத்தில், பினராயி விஜயன், அவரது மகள் வீணா, அவரது கணவரும், முன்னாள் அமைச்சருமான முகமது ரியாஸ் உள்ளிட்டோர் மீது எப்.ஐ.ஆர்., பதிய கோரி, கடந்த மாதம் கேரள போலீசுக்கு அமலாக்கத் துறை கடிதம் எழுதியது. எனினும், காங்., அரசு தீவிரம் காட்டவில்லை.

இது தொடர்பான வழக்கை சமீபத்தில் விசாரித்த கேரள உயர் நீதிமன்றம், அமலாக்கத் துறை அறிக்கையின் அடிப்படையில், பினராயி விஜயன், வீணா உள்ளிட்டோர் மீது ஊழல் தடுப்பு சட்டத்தின் கீழ் வழக்கு பதிய உத்தரவிட்டது.

இந்நிலையில், உயர் நீதிமன்ற உத்தரவுப்படி, 'சி.எம்.ஆர்.எல்., - எக்ஸாலாஜிக்' தொடர்புடைய லஞ்ச வழக்கில், பினராயி விஜயன், வீணா, முகமது ரியாஸ் உள்ளிட்டோர் மீது லஞ்ச ஒழிப்பு போலீசார் நேற்று வழக்கு பதிந்தனர். இந்த வழக்கில், முதல் குற்றவாளியாக பினராயி விஜயனும், இரண்டாவது குற்றவாளியாக வீணாவும் சேர்க்கப்பட்டு உள்ளனர்.

இது தவிர, சி.எம்.ஆர்.எல்., நிறுவனத்திடம் இருந்து பெற்ற பணத்தை ஹவாலா வழிகள் மூலம் வெளிநாட்டுக்கு பணம் அனுப்பப்பட்டதாகக் கூறப்படும் புகார் குறித்தும், லஞ்ச ஒழிப்பு போலீசார் வழக்குப் பதிவு செய்தனர். இந்த வழக்கில், வீணாவின் கணவரும், மார்க்சிஸ்ட் எம்.எல்.ஏ.,வுமான முகமது ரியாஸ் முதல் குற்றவாளியாகவும், வீணா இரண்டாவது குற்றவாளியாகவும் சேர்க்கப்பட்டு உள்ளனர்.

இதற்கு மார்க்சிஸ்ட் கடும் எதிர்ப்பு தெரிவித்துள்ளது. இந்த வழக்கில் விசாரணைக்கு ஆஜராகும்படி, பினராயி விஜயன், வீணா உள்ளிட்டோருக்கு சம்மன் அனுப்ப லஞ்ச ஒழிப்பு போலீசார் திட்டமிட்டு உள்ளதாகவும் தகவல்கள் தெரிவிக்கின்றன.