புதுச்சேரி: சவுதி அரேபியாவில் தாக்குதல் நடத்தப்பட்ட பகுதியில் மருத்துவமனையில் நர்சாக பணியாற்றும் மகளின் நிலை தெரியாமல், புதுச்சேரியில் உறவினர்கள் கதறி வருகின்றனர்.

சவுதி அரேபியாவின் சர்வதேச விமான நிலையம் மீது ஹவுதி பயங்கரவாத அமைப்பு நேற்று முன்தினம் ஏவுகணை தாக்குதல் நடத்தியது. இதில், 13 பேர் பலியாகினர். 300க்கும் மேற்பட்டோர் படுகாயமடைந்தனர். சம்பவம் நடந்த இடம் அருகில் சவுதியின் பிரபலமான ஜெர்மன் மருத்துவமனை இயங்கி வருகிறது. இங்கு, புதுச்சேரி காராமணிகுப்பத்தை சேர்ந்த முஸ்தபா என்பவரின் மகள் ஆயிஷா நர்சாக பணியாற்றி வருகிறார். நேற்று அதிகாலையில், விமான நிலைய தாக்குதல் நடந்தபோது, அதிகாலை 3 மணி வரை ஆயிஷா பதட்டத்துடன் தனது பெற்றோரிடம் பேசி உள்ளார்.

அதன் பிறகு அவரது மொபைல் போன் தொடர்பு துண்டிக்கப்பட்டது. அதன் பின் ஆயிஷாவை தொடர்பு கொள்ள முடியவில்லை. அவருடன் பணிபுரியும் கடலுார் மாவட்டம், நெல்லிக்குப்பத்தை சேர்ந்த பெண்ணையும் தொடர்பு கொள்ள முடியவில்லை.

இருவரும் சவுதி அரேபியாவில் உள்ள இந்திய துாதரகத்தில் பாதுகாப்புடன் உள்ளதாக மருத்துவமனை தரப்பிலிருந்து கூறப்பட்டதாக தெரிகிறது. ஆனாலும் ஆயிஷா, அவருடன் பணியாற்றிய மற்றொரு பெண்ணையும் தொடர்பு கொள்ள முடியாததால், புதுச்சேரி மற்றும் கடலுாரில் உள்ள உறவினர்கள் தவியாய் தவித்து வருகின்றனர்.