திருவெண்ணெய்நல்லூர்: பானையில் வைத்திருந்த பணத்தை மர்ம நபர்கள் வீடு புகுந்த திருடி சென்ற சம்பவம் பரபரப்பை ஏற்படுத்தி உள்ளது.

விழுப்புரம் மாவட்டம், திருவெண்ணெய்நல்லுார் அடுத்த கருவேப்பிபாளையம் கிராமத்தை சேர்ந்தவர் புருஷோத்தமன் மனைவி பழனியம்மாள், 60; கூலி தொழிலாளி. இவரிடம் மகள் சவுமியா, ரூ.3 லட்சத்தை கொடுத்து பத்திரமாக வைத்துக் கொள்ள சொன்னார்.

பணத்தை பெற்றுக் கொண்ட பழனியம்மாள் வீட்டில் உள்ள பானையில் வைத்திருந்தார். இந்நிலையில் கடந்த, 7ம் தேதி பானையை பார்த்தபோது பணம் காணாமல் போய் இருப்பது தெரியவந்தது.

அதிர்ச்சியடைந்த பழனியம்மாள் சம்பவம் குறித்து அப்பகுதி மக்கள் உதவியுடன் திருவெண்ணெய்நல்லுார் போலீசாருக்கு தகவல் தெரிவித்தார். சம்பவ இடத்திற்கு சென்ற சப்–இன்ஸ்பெக்டர் ராஜேஷ் மற்றும் போலீசார் வழக்குப்பதிந்து சம்பவம் குறித்து விசாரித்து வருகின்றனர்.