குஜிலியம்பாறை: திண்டுக்கல் மாவட்டம் குஜிலியம்பாறை அருகே மூதாட்டியிடம் 5 பவுன் நகைகள், ரூ.3 லட்சம் பெற்று மோசடி செய்த புகாரில் ஒருவரை போலீசார் கைது செய்தனர். மற்றொருவரை தேடி வருகின்றனர்.

கரிக்காலி ஊராட்சி விராலிப்பட்டியை சேர்ந்தவர் பெருமாள் மனைவி பாப்பாத்தி 70. இவர் 2019ல் குடும்ப செலவிற்காக தனது 5 பவுன் நகையை உறவினரான டி.கூடலுார் பால்வார்பட்டி மணியிடம் கொடுத்து அங்குள்ள வங்கியில் அடகு வைத்தார்.

2021ல் நகையை மீட்டுத்தருமாறு கேட்டதை தொடர்ந்து மணியும் அவரது நண்பரான கரூர் மாவட்டம் கடவூர் தாலுகா பூஞ்சோலைப்பட்டி சுரேஷ் 42, என்பவரும் சேர்ந்து நகையை திருப்பினர். ஆனால் நகையை பாப்பாத்தியிடம் கொடுக்காமல் சுரேஷ் கொண்டு சென்றார்.

மேலும் கரூர் மாவட்டத்தில் பாப்பாத்திக்கு சொந்தமான நிலத்திற்கு பட்டா வாங்கித் தருவதாக கூறி சுரேஷ் ரூ.3 லட்சம் பெற்றுக் கொண்டு அதனையும் வாங்கித் தரவில்லை. இது குறித்து பாப்பாத்தி குஜிலியம்பாறை போலீசில் புகார் அளித்தார். இன்ஸ்பெக்டர் ராஜா விசாரணை நடத்தி சுரேஷை கைது செய்தார். தலைமறைவாக உள்ள மணியை தேடி வருகிறார்.