சென்னை: சென்னையில் மழை முன்னேற்பாடுகளை செய்து வருகிறோம். அதையும் தாண்டி 30 சென்டி மீட்டருக்கும் அதிகமாக மழை பெய்தால் என்ன செய்ய முடியும் என்று அமைச்சர் விக்னேஷ் கூறியுள்ளார்.

அவரது பேட்டி;

பருவமழை முன்னேற்பாடுகளை சென்னை மாநகராட்சியின் 14வது மண்டலத்தில் பார்வையிட்டோம். நீர்வழிப்பாதைகளில் உள்ள ஆக்கிரமிப்புகளை அகற்றி சரி செய்யும் நடவடிக்கைகளை அரசு மேற்கொண்டு வருகிறது. கிட்டத்தட்ட 70 சதவீதம் பணிகள் முடிந்திருக்கின்றன. இன்னும் 2 அல்லது 3 நாட்களில் முழு பணிகளும் நிறைவடைந்துவிடும்.

மழைநீர் தேங்கினால் அவற்றை வெளியேற்றும் நடவடிக்கைகள் மேற்கொள்ளப்படுகின்றன. சென்னை மாநகராட்சியின் 14வது மண்டலத்தில் 30 படகுகள் ஏற்பாடுகள் செய்யப்பட்டுள்ளன. 20 படகுகள் கொண்டு வரப்பட்டுள்ளன. இன்னும் சில படகுகள் வரவிருக்கின்றன.

குடியிருப்புகளில் வெள்ளம் வருகிறது. இயற்கையை எப்படி கணிக்கமுடியும்? நாம் ஒரு 20 செமீ மழை பெய்யக்கூடும் என்று கணிக்கிறோம். ஆனால் 30 செமீ பெய்தாலும் சமாளிக்கும் அளவுக்கு ஏற்பாடுகளை செய்கிறோம். மழை அளவு அதிகமானால் நாம் என்ன செய்ய முடியும்?

இவ்வாறு அமைச்சர் விக்னேஷ் கூறினார்.