உளுந்துார்பேட்டை: உளுந்துார்பேட்டை அருகே அரசு பஸ்சின் மீது மின்விளக்கு கம்பம் விழுந்ததால் பரபரப்பு ஏற்பட்டது.

உளுந்துார்பேட்டையில் இருந்து காட்டுஎடையார் செல்லும் அரசு பஸ் பயணிகளை ஏற்றிச் சென்றுகொண்டிருந்தது. இன்று காலை 11.30 மணியளவில் உளுந்துார்பேட்டை அடுத்த சிறுப்பாக்கம் அருகே சென்ற போது சாலையோரம் இருந்த மின்விளக்கு கம்பம், திடீரென சாய்ந்து அரசு பஸ்சின் மீது விழுந்தது. உடன் டிரைவர், பஸ்சை நிறுத்தி பயணிகளை பாதுகாப்பாக இறக்கி விட்டார். மின்கம்பம் அரசு பஸ்சின் மீது விழுந்ததில் எந்த சேதமும் ஏற்படவில்லை.

அப்போது மின் கம்பத்தில் மின்சாரம் தடைப்பட்டு இருந்ததால் பெரும் விபத்து தவிர்க்கப்பட்டது. உடன் அருகில் இருந்தவர்கள் மின் கம்பத்தை அகற்றி பஸ்சை அனுப்பி வைத்தனர். ஓடிக்கொண்டிருந்த அரசு பஸ்சின் மீது கம்பம் விழுந்ததால் பரபரப்பு ஏற்பட்டது.