திருப்பூர்: பிரதான குழாயில் உடைப்பு ஏற்பட்டு மூன்று நாட்களாக தண்ணீர் வீணாகி, கால்வாயில் கலந்து வருகிறது. புகார் தெரிவித்தும், அதிகாரிகள் கண்டுகொள்ளவே இல்லை என மக்கள் வேதனை தெரிவித்தனர்.

திருப்பூரின் பிரதான சாலைகளில் ஒன்றாக உள்ள வளம் பாலம் செல்லாண்டியம்மன்துறை ரவுண்டானா எதிரே உள்ள மிஷின் வீதி. இந்த வீதி வழியாக, நகரில் பல்வேறு பகுதிகளுக்கு மெயின் குழாய் வழியாக குடிநீர் செல்கிறது. கடந்த, 19 ம் தேதி காலை குழாய் உடைப்பு ஏற்பட்டு, தண்ணீர் வெளியேற துவங்கியது. மூன்று நாட்களாக, 72 மணி நேரமாகியும் தண்ணீர் தொடர்ந்து வீணாகி, கால்வாய் சென்று கொண்டிருக்கிறது.

அப்பகுதியினர் கூறுகையில்,‘ குழாய் உடைந்து ஆயிரக்கணக்கான லிட்டர் குடிநீர் தொடர்ந்து வீணாவது குறித்து தெரியப்படுத்தியும், வினியோகத்தை நிறுத்தவில்லை. வீடுகளுக்கு எட்டு நாட்களுக்கு ஒருமுறை தண்ணீர் வினியோகிக்கப்படும் நிலையில், இப்படி நாள்கணக்கில் கால்வாயில் தண்ணீர் ஓடி வீணாவது வேதனையாக இருக்கிறது,’ என்றனர்.